Zamanaýı kitaphana kelbeti qandaı bolýy tıis
QARAǴANDY. KAZINFORM – Tsıfrlyq tehnologııalar damyǵan zamanda jalt-jult etken áleýmettik jeliler jurttyń nazaryn jaýlap alǵany haq. Al adamdardyń kitapqa qyzyǵýshylyǵyn arttyrý úshin kitaphanalarymyz básekege qabiletti bola bilýi tıis. Osy jáne basqa da ózekti máseleler «Qaraǵandy09: erkin dıalog aýmaǵy» OpenTalk-te kóterildi.
Qaraǵandy qalasyndaǵy N.V. Gogol atyndaǵy obystyq ámbebep ǵylymı kitaphanasynda ótken halyqaralyq sharaǵa qonaq retinde Qazaqstan ulttyq kitaphanalarynyń basshylary, Reseı men Túrkııanyń sarapshylary keldi.
OpenTalk-ke qatysýshylar qazirgi zamanǵy kitaphanalyq qyzmettiń teorııalyq jáne tájirıbelik baǵyttaryn talqylap, qoǵamdyq jáne joǵary oqý oryndarynyń kitaphanalary, murajaılar men muraǵattardyń ózara is-qımyly jaıly pikirlerin ortaǵa saldy. Sondaı-aq shara barysynda elimizdiń 11 oblysynan kelgen kitaphana basshylary men jetekshi mamandary paneldik sessııalarǵa qatysyp, shyǵarmashylyq ádistemelerimen jáne tabysty tájirıbelerimen bólisti.
Qazaqstan, Reseı jáne Túrkııadan kelgen sarapshylar elimizdegi kitaphana jumysy qarqyndy damyp kele jatqanyn jáne jastardyń kitap oqýǵa degen qyzyǵýshylyǵy artqanyn atap ótti. Mundaı jetistikterge jetýdiń birden bir sebebi Qazaqstanda kitaphanalardyń tsıfrlyq transformatsııasynyń qarqyndaýy, deıdi sarapshylar. Kitaphanalardyń jumysyn ilgeriletýdi kózdegen mamandar Prezıdent Qasym-Jomart Toqaevtyń tapsyrmasy boıynsha «Ulttyq elektrondyq kitaphana» jobasyn júzege asyryp otyr.
«Bul jobanyń basty maqsaty – barlyq ulttyq kitaphanalardyń oqyrmandar úshin tsıfrlyq formatta qoljetimdi bolýy. Búgingi tańda biz eki oblystyń kitaphanasyn tsıfrlyq formatqa aýystyrdyq. Al pılottyq joba retinde biz olardy Qaznetke engizemiz. Oǵan 80 el kiredi jáne ondaǵy barlyq kitaptar tsıfrlyq formatta qoljetimdi, – dedi muraǵat, qujattama jáne kitaptaný komıtetiniń kitaphana bóliminiń bastyǵy Almaz Myrzahmet.
Reseıden kelgen sarapshy Irına Mıhno bolsa óz kezeginde qazirg kitaphanashylardyń aldynda turǵan mańyzdy mindetterdiń biri – jastardyń kitapqa degen qyzyǵýshylyǵyn saqtaý jáne damytý jaıly óz oıymen bólisti
– Búginde Reseı kitaphanalary, Qazaqstan sııaqty, memlekettik jastar saıasatyna sáıkes kelýge tyrysýda. Sondyqtan kitaphana isindegi ártúrli mádenıetterdiń ózara árekettesýi óte mańyzdy. Bizdiń kitaphanaǵa kún saıyn 800–900 adam keledi. Jastar kitaphana keńistigin jáne olardyń múddeleri men qajettilikterine sáıkes keletin resýrstardy tartady. Kitaphana jastardyń bos ýaqytyn paıdaly túrde ótkizetin orny týraly túsinikterine sáıkes bolýy kerek. Bul jaǵdaıda bilimdi usynýdyń ártúrli formattary bolýy kerek – aýyzsha, baspa, dıalog. Jastar búginde qarym-qatynasqa kóbirek tartylady. Oqyrmandardyń qalaýy da ózgerdi. Eger birneshe jyl buryn jastar kórkem ádebıetti unatsa, búginde non-fıkshnge kóbirek kóńil bóledi, – deıdi Reseı memlekettik jastar kitaphanasynyń dırektory Irına Mıhnova.
Spıkerlerdiń baıandamalarynan bólek, sessııa sheńberinde «Kitaphana – jańa qoǵamdyq keńistik» atty jańa kitaptyń tusaýkeseri, kitaphanananyń 90-jyldyq mereıtoı aıasynda jarııalanǵan «Jastardy kitaphanaǵa tartý» atty iske asyrylǵan jobalardyń ashyq baıqaýynyń jáne «HackTheBookshelf» hakatonynyń jeńimpazdaryn marapattaý rásimi ótkizildi. Kásibı sharanyń jalǵasynda kitaphanashylar pikirtalas alańdarǵa, sheberlik saǵattarǵa jáne dóńgelek ústelge qatysyp, tájirıbelerimen almasty.
Halyqaralyq is-sharanyń ekinshi kúni Reseı ulttyq kitaphanasymen (Sankt-Peterbýrg q., RF), Reseı memlekettik jastar kitaphanasymen (Máskeý q., RF), A.S.Pýshkın atyndaǵy Omby oblystyq kitaphanasymen (Omby q., RF) Yntymaqtastyq týraly memorandýmdarǵa qol qoıý rásimi ótti.
Budan bólek kitaphana isin jandandyrýǵa baǵyttalǵan mereıtoılyq is-sharanyń jalǵasy retinde qazaq ádebıetiniń, aımaqtyń shyǵarmashylyq shyńdalýyna ózindik úles qosyp júrgen jergilikti aqyn-jazýshylardyń qatysýymen «Jańa dáýir ádebıeti: dástúr jáne jalǵastyq» atty dóńgelek ústel ótti. Mańyzdy sharanyń moderatory QR Mádenıet jáne aqparat mınıstrliginiń Arhıv, qujattama jáne kitap isi komıtetiniń Kitap isi basqarmasynyń basshysy Almaz Myrzahmet boldy.
Sonymen birge J.Bekturov atyndaǵy Qaraǵandy oblystyq jasóspirimder kitaphanasynda «Jastarmen jumys jasaýdyń zamanaýı tájirıbeleri» atty ashyq dıalogy uıymdastyryldy.
