YouTube Tramptyń akkaýntyn buǵattaǵany úshin shamamen 25 mln dollar tóleıdi
ASTANA. KAZINFORM — YouTube beınehostıng kompanııasy 2021 jyly Kapıtolııdegi tártipsizdikterden keıin akkaýnttary jabylǵan AQSh prezıdenti Donald Tramptyń sotqa shaǵymyn retteý úshin 24,5 mln dollar tóleýge kelisti, dep habarlaıdy DW.
Kelisim sharttaryna sáıkes, bul somanyń 22 mln dollary Aq úıdiń bal zalyn salýǵa jaýapty Trust for the National Mall uıymyna jiberiledi. Qalǵan 2,5 mln dollardy is boıynsha basqa talapkerler, sonyń ishinde jazýshy Naomı Výlf pen Amerıkalyq konservatorlar odaǵy (American Conservative Union) arasynda úlestiriledi.
Eske sala ketsek, 2021 jyly prezıdent saılaýynyń qorytyndysyna narazy bolǵan Tramp jaqtastary Kapıtolıı ǵımaratyna basyp kirgennen keıin Tramptyń Facebook, Instagram, YouTube jáne Twitter akkaýnttary buǵattaldy. Áleýmettik jeli basshylarynyń pikirinshe, saıasatker bul aktsııany óz jazbalary arqyly quptady.
Alaıda Tramptyń ózi buny zańsyz tsenzýra dep baǵalady.
Ilon Mask 2022 jyldyń aıaǵynda X kompanııasyn (ol kezde Twitter degen ataýymen belgili) satyp alǵannan keıin ol Tramptyń akkaýntyn qalpyna keltirdi. 2023 jyldyń aqpanynda Meta jáne kelesi aıda — YouTube týra solaı istedi.
Buǵan deıin Tramptyń Facebook jáne Twitter akkaýnttarynyń toqtatylýyna baılanysty sot isin retteý úshin amerıkalyq Meta Platforms jáne X kompanııalary tıisinshe 25 mln jáne 10 mln dollar ótemaqy tóleýge kelisti.
Osylaısha, YouTube-ke ıelik etetin Alphabet Donald Tramppen sot isin sheshken úshinshi iri tehnologııalyq kompanııa boldy.
Eske sala ketsek, ótken jyldyń jeltoqsan aıynda Tramp Kapıtolıı búlikshilerin keshirýge ýáde berdi.
Tamyz aıynda Aq Úı TikTok-ta resmı akkaýnt ashty.