Iemendik hýsıtter BUU-nyń ustalǵan bes qyzmetkerin bosatty
ASTANA. KAZINFORM — Iemendik kóterilisshilerdiń áreketi halyqaralyq gýmanıtarlyq qurylymdar qaýipsizdigine taǵy da qaýip tóndirdi, dep habarlaıdy Kazinform menshikti tilshisi.
Hýsıtter el astanasy Sanada demalys kúnderi ustalǵan Iemen azamattary — BUU-nyń bes qyzmetkerin bosatyp, uıymnyń 15 sheteldik qyzmetkerine keshen ishinde erkin júrýge ruqsat berdi.
Bul týraly BUU Bas hatshysynyń resmı ókili Stefan Dıýjarrık málimdedi.
Onyń aıtýynsha, qarýly sodyrlar ókildik ǵımaratyn reıdten keıin tastap ketken, bul reıd hýsıtter baqylaýyndaǵy aımaqtarda áreket etetin halyqaralyq uıymdarǵa qysymnyń taǵy bir kórinisi boldy. BUU málimetinshe, 2021 jyldan beri Iemende túrli agenttikterdiń 53 qyzmetkeri zańsyz qamaýǵa alynǵan.
Dıýjarrık Bas hatshy Antonıý Gýterrıshtiń Saýd Arabııasy, Iran jáne Oman syrtqy ister mınıstrlerimen kelissóz júrgizgenin atap ótip, olardy qamaýǵa alynǵan barlyq qyzmetkerdiń bosatylýyna septigin tıgizý etý úshin óz yqpaldaryn paıdalanýǵa shaqyrdy.
— Óte sypaıy kelissóz júrgizilip jatyr. Aımaqta yqpaly bar elderdiń BUU qyzmetkerleriniń qaýipsizdigin qamtamasyz etýge kómektesýi óte mańyzdy, — dep atap ótti uıym ókili.
Dıplomatııalyq kúsh-jigerdiń aıasynda Sanada Izraıldiń soqqysynan qaza tapqan hýsıtter qarýly kúshteri shtabynyń basshysy general Muhammed ál-Gammarıdi jappaı jerleý rásimi ótti. Iemendik SABA agenttiginiń málimetinshe, onyń 13 jastaǵy uly men oǵan jaqyn bolǵan birneshe adam qaza tapqan.
General ál-Gammarıge buǵan deıin BUU men AQSh tarapynan hýsıtterdiń áskerı operatsııalaryna jetekshilik etkeni jáne Iemen men kórshiles elderdiń qaýipsizdigine qater tóndiretin shabýyldarǵa qatysqany úshin sanktsııa salynǵan bolatyn.
AQSh pen Izraıl sońǵy aılarda Qyzyl teńizdegi kemelerge shabýyldary men Izraılge zymyran atqylaýyna jaýap retinde hýsıtterdiń pozıtsııalaryna áýe jáne teńiz kúshterimen soqqy jasap keledi. Gaza sektorynda soǵys bastalǵannan beri hýsıtter shabýyldardy palestınalyqtarǵa yntymaqtastyq retinde jasap otyrǵanyn málimdedi.
«Ansar Allah» qarýly búlikshiler tobynyń músheleri bolyp tabylatyn hýsıtter qazir Iemenniń basym bóligin, onyń ishinde astanasy Sana qalasyn, sondaı-aq eldiń soltústik jáne batys bólikterin baqylaýda ustap otyr.
Buǵan deıin ıemendik hýsıtter BUU-nyń 20 qyzmetkerin tutqynǵa alǵanyn jazǵan bolatynbyz.