ıAndeks «kýrer» 3,5 mln teńgeniń taýaryn satyp jibergen - Astanada úkim shyqty

ASTANA. QazAqparat – Astana qalasynyń Esil aýdandyq №2 soty alaıaqtyq jasaý faktisimen azamat Ý.-ǵa qatysty aıyptaý úkimin shyǵardy, dep habarlaıdy QazAqparat tilshisi.

Astana qalalyq sotynyń málimetinshe, kúdikti «ıAndeks» qosymshasynda taýardy klıentke deıin jetkizýshi (kýrer) bolyp tirkelgen. Ol taýardy Astana men Almaty qalalarynan ınternet-dúkender arqyly alyp, naryqtan tómen baǵamen ózge adamdarǵa satyp jibergen. Osy arqyly kúdikti zardap shegýshi tarap «ıAndeks Delıverı Keızet» JShS-ǵa 3,5 mln teńge mólsherinde materıaldyq shyǵyn keltirgen. Jalǵan kýrerdiń 24 faktige qatysy bar bolyp shyqty.

Sot barysynda kúdikti kinásin tolyǵymen moıyndap, keltirilgen shyǵyndy óteýge nıetti ekenin, sondyqtan qoǵamnan oqshaýlamaı qatesin túzeýge múmkindik berýin ótindi. Zardap shegýshi taraptyń ókili de sottan aıyptalýshyny bas bostandyǵynan aıyrmaı, shyǵyndy qaıtarýǵa múmkindik berýdi surady.

Osyǵan oraı sot azamat Ý.-ǵa 3 jyl 6 aı bas bostandyǵyn shekteý týraly úkim shyǵardy. Sondaı-aq «ıAndeks Delıverı Keızet» JShS-niń 3,5 mln teńge somasynda materıaldyq shyǵyndy qaıtarý týraly azamattyq shaǵymy tolyqtaı qanaǵattandyryldy. Úkim zańdy kúshine engen joq.