World Boxing: Taılandta bokstan alǵashqy Azııa chempıonaty ótedi

ASTANA. KAZINFORM - Taıland astanasy Bangkok qalasynda bokstan World Boxing uıymynyń U19 jáne U22 jas sanattary boıynsha alǵashqy Azııa chempıonaty ótedi.

Qurlyqtyq doda 30 shilde-12 tamyz aralyǵyna belgilengen. Oǵan 25 elden 396 boksshy (237 er jáne 159 áıel) qatysady dep josparlanyp otyr. Olardyń arasynda Qazaqstan, Aýǵanstan, Fılıppın, Gonkong, Úndistan, Indonezııa, Iran, Irak, Japonııa, Ońtústik Koreıa, Saýd Arabııasy, Qyrǵyzstan, Malaızııa, Mońǵolııa, Nepal, Qatar, Qytaı, Sıngapýr, Shrı-Lanka, Taıland, Túrkimenstan, Ózbekstan, BAÁ, Vetnam, Býtan bar.

Azııa chempıonatynda 22 jasqa deıingi jastar quramasynda Baqyt Sársekbaev bas bapkerlik qyzmet atqarady. Eki aı buryn Shrı-Lankada ótken jarysta onyń basshylyǵymen qazaqstandyq boksshylar 10 altyn, 2 kúmis alǵan edi. 

Taılandtaǵy qurlyqtyq dodaǵa baratyn boksshylar quramy aıtarlyqtaı ózgerdi. Atap aıtqanda, burynǵy quramnan Nurıslam Qaldybaev (60 keli), Aman Qonysbekov (75 keli), Azatbek Joldashan (85 keli) ǵana bar. Olardan basqa Nurzat Ońǵarov (50 keli), Beksultan Boranbek (55 keli), Ilıa Kalının (65 keli), Nurbek Mýrsal (70 keli), Sanjaráli Begalıev (80 keli), Temirlan Muqataev (90 keli), Nurasyl Asylhan (90 keliden joǵary) el namysyn qorǵaıdy.

Eske salsaq, Qazaqstannyń boks federatsııasy ótken jyldyń qarasha aıynda resmı túrde World Boxing-tiń tolyqqandy múshesi atandy.