WIW-2018: Qostanaılyq stýdentter ınvestıtsııalyq saýattylyǵyn arttyrmaq
Jastardyń qarjylyq jáne ınvestıtsııalyq saýattylyǵyn arttyrýǵa baǵyttalǵan shara A.Baıtursynov atyndaǵy Qostanaı memlekettik ýnıversıtetiniń ǵımaratynda bastaldy. Jıyndy «Astana» Halyqaralyq qarjy ortalyǵynyń «jasyl» qarjylandyrý departamenti dırektory Ásel Nurahmetova júrgizdi. Onyń aıtýynsha, «jasyl» ekonomıka búginde adamzattyń damýyna aıtarlyqtaı áser etedi.
«Negizi, qalypqa keletin energııa kózderi, ıaǵnı ekologııa «jasyl» qarjy túsinigine jaqyndaıdy. «Jasyl» ınvestıtsııalar - «Astana» Halyqaralyq qarjy ortalyǵynyń damýynyń negizgi baǵyttarynyń biri. 1992 jyly BUU álemniń birneshe memleketiniń qatysýymen klımatqa qatysty konventsııa qabyldandy. 2015 jyly ótken Parıj kelisimin jaqsy bilesizder. Bul jıyndardyń bárinde ekologııalyq turaqtylyq týraly jan-jaqty aıtyldy. Kelisim boıynsha damyǵan jáne ótpeli ekonomıkasy bar elder jylyjaı gazdar shyǵaryndylaryn azaıtýy jáne turaqtandyrýy kerek. Qazaqstan bul kelisimniń aıasynda 2030 jyly jylyjaı gazdar shyǵaryndylaryn 15 paıyzǵa azaıtýǵa mindetteldi», - dedi Ásel Nurahmetova.
Sondaı-aq, Ásel Nurahmetova stýdentterge jasyl oblıgatsııalardyń qaryz kapıtaly naryǵynyń negizgi quraly retinde róli týraly túsindirdi. AHQO memlekettik deńgeıde táýelsiz oblıgatsııalar men memlekettik kepildikter berý máselesinde quzyrly mınıstrliktermen tyǵyz qarym-qatynas jasaıdy. AHQO-ǵa shaǵyn jáne orta bıznes ókilderi ótinishterin jiberedi, onyń ishinde qaldyqtardy qaıta óńdeý jáne «jasyl» ónimderdi shyǵarý boıynsha zaýyttar bar. Іri ónerkásip kásiporyndary jańartylatyn energııa kózderi jáne energııany únemdeý boıynsha jobalaryn jiberedi. Árbir joba kiris jáne tıimdilik máselesi boıynsha barlyq deńgeılerde muqııat tekserýden ótedi.
Jıynda AHQO ıslamdyq qarjylandyrý departamentiniń menedjeri Qazybek Juman ıslamdyq jáne jasyl qarjylandyrý jaıynda baıandama jasady.
«Qazaqstanda dástúrli bankterden bólek ıslamdyq qarjylandyrý da bar. Bul áldebir dinı nanym-senimderge baılanysty iske asatyn bank dep oılaýyńyz múmkin. Áste olaı emes. Islamdyq qarjylandyrý úlesterdi teńdeı bólý arqyly júzege asady. Islamdyq qarjylandyrý Ortalyq Azııadaǵy qarjylandyrý haby sanalady. Sonymen qatar, bizde ınvestorlarmen jumys bir jolǵa qoıylǵan», - dedi ol.
Kúnniń ekinshi jartysynda «Astana» halyqaralyq qarjy ortalyǵynyń ókilderi óńirlik bızneske arnalǵan tanystyrylymdy usynbaq. Onda AHQO sarapshylary jalpy bıznes, jasyl jáne ıslamdyq oblıgatsııalardy shyǵarý erekshelikterin, AHQO tirkelý amaldarynyń artyqshylyqtaryn kórsetedi.
Aıta keteıik, «IOSCO» Qundy qaǵazdary jónindegi halyqaralyq komıssııa uıymy qoldaýymen 2018 jyldyń 1-7 qazanynda Investorlardyń ekinshi halyqaralyq aptalyǵy (odan ary - WIW-2018) ótedi. Bir apta boıy 80-nen astam qarjylyq retteýshi uıymdar men 6 qurlyqtyń qarjy naryǵyna múddeli qatysýshylary túrli is-sharalar ótkizýdi josparlady. Olardyń basty maqsaty - qarjy qyzmetterin tutynýshylardy qorǵaý jáne ınvestıtsııalaý negizderin túsindirý.
