Wildberries ınternet dúkeninde saýda jasaı almaǵan klıentter ne isteýi kerek

NUR-SULTAN. QazAqparat - QR saýda jáne ıntegratsııa mınıstrligi Wildberries saýda jelisiniń elimizdegi qyzmetine qatysty túsinik berdi, dep habarlaıdy QazAqparat tilshisi.

«Bizde Eýrazııa ekonomıka odaǵy jáne tıisti salalyq bólim bar. Onyń ókilderimen sala jumysyna qatysty bosqosýlar ótip turady. Internet saýdany ózge eldiń jelisi júrgizgen sátte, bizdiń eldiń salaǵa qatysty zańy ol jaqta júrmeıdi. Degenmen halyqaralyq qaýymdastyqtarmen tyǵyz qarym-qatynastyń arqasynda máseleni sol sátte jetkizip otyramyz. Óz tarapymyzdan tutynýshylardyń quqyǵyn qorǵaý maqsatynda zańnamaǵa qosymsha ózgeris engizýdi qarastyramyz», - dedi QR saýda jáne ıntegratsııa mınıstrligi tutynýshylardyń quqyǵyn qorǵaý komıteti tóraǵasynyń orynbasary Serik Qusaıynov BAQ ókilderimen kezdesý barysynda.

Odan bólek, saýda mınıstrliginiń ókili Wildberries jelisiniń qoldanýshylaryna keńes berdi.

«Atalǵan saýda jelisiniń qyzmetine qatysty problema týyndasa tutynýshylardan bizdiń komıtetke habarlasýdy ótinemiz. Komıtettegi úılestirý bólimi klıenttiń máselesin nazarǵa alady. Aldymen ony anyqtap, qajet jaǵdaıda tıisti eldiń ókildigine habarlasyp, máseleni sheshýin suraımyz», - deıdi ol.

Aıta ketsek, buǵan deıin qazaqstandyq tutynýshylar Wildberries ınternet saýda jelisiniń jumysyna shaǵymdanǵan edi.

Qoldanýshylardyń aıtýynsha, atalǵan ınternet dúken arqyly saýda jasaý múmkin bolmaǵan.

Buǵan deıin komıtet basshysynyń orynbasary ınternet saýdasy boıynsha qazaqstandyq tutynýshylardyń quqyǵy qalaı qorǵalatynyn aıtqan.