WhatsApp jelisiniń basshysy Telegram-dy qoldanbaýǵa shaqyrdy

ASTANA. QazAqparat – WhatsApp messendjeriniń basshysy Ýıll Ketkart áleýmettik jeli qoldanýshylaryn Telegram platformasynan bas tartýǵa shaqyrdy. Bul týraly Ýıll Ketkart óziniń Twitter paraqshasynda jazdy, dep habarlaıdy QazAqparat tilshisi.

WhatsApp basshysynyń pikirinshe, Telegram derekterdiń qaýipsizdigin tolyq qamtamasyz etpeıdi.

«Olardyń e2ee (end-to-end encryption) hattamalarynda aqparatty ózge qoldanýshylardan qorǵaıtyn, shıfrlaıtyn táýelsiz tekserý joq. Telegram-da kóptegen tehnologııalyq kompanııalar qabyldaǵan naqty ashyqtyq qaǵıdaty da joq. Platformadaǵy óreskel qatelikter adamdarǵa qaýip tóndiredi», - dep jazdy Ýıll Ketkart óziniń Twitter paraqshasynda.

Sonymen qatar, ol atalǵan messendjer qupııa chattardaǵy málimetterdi ózge adamdardyń oqýyna múmkindik beretinin málim etti. Buǵan qosa, Ýıll Ketkart Telegram ákimshiligi úkimet suratýy boıynsha kez kelgen qupııa aqparatty usynatynyn jazǵan.