WhatsApp messendjerinde ózgeniń aryna tıgen atyraýlyq aıyppul tóledi
Atyraý oblysynyń turǵyny WhatsApp messendjerinde ózgeniń aryna tıetin dybystyq habarlama jibergen. Sot úkimimen quqyq buzýshyǵa 69 myń teńge aıyppul salyndy, dep habarlaıdy Kazinform.
Jylyoı aýdandyq sotynda jábirlenýshi A.T.-nyń abyroıy men qadir-qasıetin kemsitken adamǵa qatysty qylmystyq is qaraldy. Aıyptalýshy Z.I.-ǵa qatysty QR Qylmystyq kodeksiniń 131-babynyń 1-bóligimen (Qorlaý, ıaǵnı basqa adamnyń abyroıy men qadir-qasıetin ádepsiz túrde kemsitý) aıyp taǵylǵan.
«Jábirlenýshi A.T. aryzynda Z.I.-dyń WhatsApp jelisi arqyly abyroıy men qadir-qasıetine tıetin dybystyq jazba joldaǵanyn kórsetip, ony qylmystyq jaýapkershilikke tartýdy surady. Sot iske qatysýshylardy tyńdap, dáleldemelerdi zerttedi. Sot psıhologııalyq-fılologııalyq saraptama qorytyndysyna sáıkes, sottalýshy Z.I-diń is-áreketinde Qylmystyq kodeksiniń 131-babynyń 2-bóliginde kózdelgen qylmystyq teris qylyqtyń quramy bar dep tapty. Alaıda, shaǵymdanýshynyń Z.I.-dy atalǵan 131-baptyń 1-bóligimen jaýaptylyqqa tartý týraly aryzyna baılanysty is jeke aıyptaýdyń sheńberinde qaraldy», - dep habarlady aýdandyq sottyń baspasóz qyzmeti.
Sot úkimimen quqyq buzýshyǵa 20 aılyq eseptik kórsetkish mólsherindegi 69 myń teńge aıyppul salyndy. Sottalýshy Z.I.-dan jábirlenýshiniń paıdasyna saraptama júrgizýmen baılanysty 293 myń 250 teńgeniń sot-protsestik shyǵyny óndirildi.
Sot úkimi zańdy kúshine engen joq.
Eske sala keteıik, buǵan deıin Atyraýda sıntetıkalyq esirtki tasymaldaǵan kúdikti kúzetshi bolyp jumys istegenin habarlaǵan edik.
