Westinghouse Electric Company LLC kompanııasyn qaıta qurý Qazatomónerkásipke keri áser etpeıdi

ASTANA. QazAqparat - «Qazatomónerkásip» UAK» AQ 2017 jylǵy 29 naýryzda amerıkalyq Westinghouse Electric Company LLC kompanııasy (japondyq «Toshiba» korporatsııasynyń enshiles kompanııasy) men onyń birqatar úlestes kompanııalary («Westinghouse Group») AQSh-tyń Bankrottyq týraly kodeksiniń 11-babyna sáıkes elektr stantsııalarynyń birneshe jobalaryna baılanysty qarjylyq narazylyǵyn sheshý úshin Nıý-Iork qalasynyń Ońtústik okrýgindegi bankrottyq isteri jónindegi AQSh sotyna qaıta uıymdastyrý týraly ótinish túsirgenin habarlady.

«Qazatomónerkásip» UAK» AQ «Toshiba» korporatsııasynan aktsııalar paketin «optsıon-pýt» shartymen satyp aldy. Bul shartqa saı qazaqstandyq kompanııa óz aktsııalaryn bastapqy ınvestıtsııaǵa sáıkes keletin bekitilgen baǵamen qaıtadan «Toshiba» korporatsııasyna satý quqyna ıe.

Osylaısha, «Toshiba» korporatsııasymen jasalǵan pýt-optsıon týraly kelisimge sáıkes, eger ol iske asa qalsa, «Qazatomónerkásip» UAK» AQ ózi salǵan qarjysyn qaıtarý úshin kelisilgen quqyqqa ıe bolmaq.

«Westinghouse Electric Company LLC» kompanııasyn qaıta qurý «Qazatomónerkásip» UAK» AQ-nyń qarjylyq kórsetkishterine keri áser etpeıdi.

«Qazatomónerkásip» UAK» AQ - Qazaqstannyń ýran jáne onyń qosyndylaryn, sırek metaldar, atom elektr stantsııalaryna arnalǵan ıadrolyq otyn, arnaıy qural-jabdyqtar, tehnologııalar eksportymen aınalysatyn ulttyq operatory. Kompanııa qyzmetiniń basty baǵyttary - geologııalyq barlaý, ýran óndirisi, ıadrolyq otyn tsıkly ónimderin óndirý jáne konstrýktsııalyq materıaldar óndirisi. Búgingi tańda kompanııada 26 000-nan astam adam eńbek etedi. Qazatomónerkásip álemniń jetekshi ýran óndirýshi kompanııalarynyń kóshin bastap keledi.