Washington Post: AQSh Iranǵa qaraı 150 ushaq jumyldyrdy

ASTANA.KAZINFORM – Amerıka Qurama Shtattary Iranǵa qarsy áskerı operatsııa júrgizý úshin Taıaý Shyǵystaǵy avıabazalar men Eýropaǵa 150 ákerı ushaq jiberdi.

Armenpress-tiń habarlaýynsha, bul týraly avıatsııalyq resýrstar men spýtnıktik túsirilimderge silteme jasap, The Washington Post jazǵan.

Basylymnyń jazýynsha, AQSh áskeri 2003 jylǵy Iraktaǵy soǵystan keıingi óńirge osynshama aýqymda ásker jibergen emes. Áskerı belsendilik AQSh prezıdenti Donald Tramptyń Iranmen ıadrolyq baǵdarlamany shekteý jóninde kelisimge qol jetkizilmegen jaǵdaıda, soqqy jasaý múmkindigin meńzegen málimdemesinen keıin kúsheıgen. Tegeran ókilderi kelisimge kelý yqtımal ekenin aıtqanymen, bul úshin ýaqyt qajet ekenin jetkizdi.

Sarapshylardyń pikirinshe, qazirgi kúshter aýqymy 2025 jyldyń maýsymynda Irannyń ıadrolyq nysandaryna jasalǵan amerıkalyq soqqylar aldyndaǵy daıyndyqtan da aýqymdy. Bul birneshe kúnge sozylýy múmkin áskerı naýqannyń stsenarııi qarastyrylyp otyrǵanyn ańǵartady.

Basylym sonymen qatar ondaǵan qosymsha ushaq USS Gerald R. Ford ushaq tasymaldaýshy kemesiniń bortynda ekenin jazady. Keme 23 aqpanda Krıt aralyndaǵy bazaǵa kirgen. Bul Taıaý Shyǵysqa jiberilgen ekinshi amerıkalyq ushaq tasýshy keme. Osylaısha qazir AQSh-tyń qoldanystaǵy áskerı-teńiz kemeleriniń shamamen úshten biri osy óńirge shoǵyrlanyp otyr.

Basylymǵa pikir bildirgen, AQSh Qorǵanys mınıstriniń Taıaý Shyǵys jónindegi burynǵy orynbasary, qazirgi Vashıngton ınstıtýty zertteý dırektory Dana Stroýldyń aıtýynsha, shoǵyrlanǵan áskerı kúshtiń aýqymy áskerılerdiń Tramptyń kez kelgen sheshimin júzege asyrýǵa daıyn ekenin kórsetedi.

Osyǵan deıin AQSh áskeriniń Sırııadaǵy eń iri bazasynan shyǵarylyp jatqany týraly jazdyq.