VVS vıdeo-jýrnalısi: Internet ústem bolsa da televıdenıe «ónim» retinde óz mańyzyn joımaıdy
Zoıa Charlz VVS korporatsııasynda 25 jyl boıy eńbek atqarǵan. Atalǵan korporatsııanyń ınnovatsııalyq tobynda birneshe jyl boıy vıdeo-jýrnalıst, redaktor qyzmetterin atqarǵan. Sonymen birge, VVS korporatsııasynyń strategııasyn josparlaýda belsene aralasady. Astanaǵa telejýrnalıstıka mamany Ulybrıtanııanyń elshiliginiń shaqyrýymen arnaıy kelip otyr.
Atalǵan forýmda televıdenıeniń keleshegi týraly sóz qozǵaǵan Zoıa Charlz qazirgi tańda álem boıynsha televızııalyq kórermenderdiń sany azaıyp, ınternettiń aýdıtorııasy kóbeıip kele jatqanyn málim etti.
«Bul úrdis barlyq televızııalyq kompanııalardyń basynan ótip jatyr. VVS óziniń sońǵy strategııasynda ınternet-taratý (ınternet-veşanıe) baǵytynda qarjyny kóptep bóldi. Demek, televızııalyq arnalardy qarjylandyrý burynǵydaı belsendi júrip jatqan joq. Sondyqtan, redaktorlar men menedjerler qazirgi tańda kórermenderdiń ár túrli núktede ár túrli jyldamdyqpen ınternetke kóship bara jatqanyn túsinýi kerek. Álbette, keıbir jerge bul júzege asyp jatsa, keıbir jerde aldaǵy 2 jylda bul úrdis báribir keledi», - deıdi ol.
Zoıa Charlzdyń aıtýynsha, ınternet zamanynyń ústemdigine aldyn ala daıarlanǵan abzal.
«Neǵurlym tezirek buǵan boı úıretseńizder, soǵurlym telekórermenderdiń ınternetke ketip bara jatqanyn tez túsinýge bolady. Sonymen birge, televıdenıe bolmaıdy degen pikir de qalyptasyp jatyr. Televıdenıe aqparat taratý quraly retinde bolmaýy da múmkin, biraq ónim retinde óz mańyzyn joımaıdy. Óıtkeni, ınternettegi eń mańyzdy ónim ol vıdeo ekenin bilesizder. Demek, televızııalyq ónimdi óndirýshi kompanııalardyń tájibesi báribir baǵasyz. Óıtkeni, aqparattyq saıttardyń qazirgi tańda qalaısha vıdeo túsirý baǵytynda qyzmetkerlerin úıretýde qınalyp jatqanyn kórgen bolarsyzdar. Gazetterdiń barlyǵy ınternetke ketip barady. Al televızııa mamandarynyń tájirıbesi báribir baǵasyz bolyp qala bermek», - deıdi Zoıa Charlz.
Eske sala ketsek, búgin Astanada «Qazaqstandyq telearnalardyń kontentindegi tsıfrlyq tehnologııalardy qoldaný» taqyrybynda aımaqtyq forým bastaldy. Aımaqtyq forýmdy Qazaqstandaǵy Ulybrıtanııa elshiligi uıymdastyryp otyr. Eýropanyń tórindegi damyǵan eldiń elshiligi sol memlekette teleradıo habaryn taratatynyn jetekshi «Thomson Foundation» uıymyn sharaǵa arnaıy ákelgen. Shara aıasynda Ulybrıtanııa men Ýkraına elderiniń tájirıbeleri negizinde baǵdarlamalardy jasaý, telearnalardy basqarý modelderi oqytylmaq.