Volonterlerdiń eńbegi árdaıym joǵary baǵalanýy kerek - Prezıdent
«Janashyrlyq qazaqtyń qanynda bar qasıet. Halqymyz qıyndyqqa tap bolǵan adamdardan kómegin aıamaǵan. El basyna kún týǵan qıyn-qystaý sátte «bir jeńnen qol, bir jaǵadan bas shyǵara» bilgen. Qazaqstanǵa jer aýdarylǵan talaı etnos ókilderin baýyryna basyp, baryn bólisken. Sondyqtan búgingi jıynnyń maqsaty halqymyzdyń bolmysymen úndes ekeni sózsiz. Men BUU-nyń 75-sessııasynda Halyqaralyq volonterlerdi jumyldyrý jylyn jarııalaýdy usyndym. Bul bastama osy tamasha dástúrdi odan ary damytý úshin qajet», - dedi Prezıdent.
Memleket basshysy ótken aptada Túrkistan qalasynda Ulttyq quryltaıdyń 2-otyrysy ótkenin eske saldy.
«Sol jıynda otanshyldyq, adamgershilik, bilimpazdyq, únemshildik, eńbekqorlyq, janashyrlyq sekildi qundylyqtar bárinen bıik turýǵa tıis ekenin atap kórsettim. Ádiletti Qazaqstandy adal azamattar qurady. Menińshe, barlyq eriktilerdi adal azamat deýge bolady. Óıtkeni, sizder jaýapty jumys, saýapty is atqaryp júrsizder. Men volonterlerdiń eńbegi árdaıym joǵar baǵalanýy kerek dep sanaımyn. Sol sebepti elimizde jyl volonteri halyqaralyq syılyǵy belgilendi. Bul marapat belsendi eriktilerge beriledi. Sonymen qatar eren eńbegimen kózge túsken eriktiler jyl saıyn «Shapaǵat» medalimen marapattalady», - dedi Qasym-Jomart Toqaev.
