Volonterler jyly ShQO eriktileri qandaı jumys atqardy
Volonterler jyly aıasynda eriktilerge memleket tarapynan erekshe qoldaý kórsetildi. Belsendi jastar da qarap qalmaı, «Bilim», «Sabaqtastyq», «Saýlyq», «Taza álem», «Asyl mura», «Qamqor», «Úmit» baǵyttaryna negizdelgen óńirlik jol kartasy aıasynda túrli áleýmettik jobalardy iske asyrdy. Máselen, 113 volonter aýyldyq jerlerdegi mektep túlekterin UBT-ǵa daıyndaýǵa, aǵylshyn tilin, kompıýterlik saýattylyqtaryn arttyrýǵa atsalysty. Al, «Qamqor» baǵytynda 1500-ǵa jýyq azamat 348 is-shara ótkizgen. Óńir eriktileri tótenshe jaǵdaı kezinde provızorlyq statsıonarlardaǵy dárigerlerge de kómek kórsetti. «Jylý syıla», «Jaqsy kórshiler», «Men úıdemin», «Úıde bol» degen sııaqty túrli aktsııalar uıymdastyryp, halyqqa erekshe qoldaý bildirdi.
– Ótken jyly naýryzda eriktilerdiń Aımaqtyq front-ofısi qurylyp, qalalar men aýdandardaǵy volonterlik toptardyń jumysy joǵary dárejede úılestirildi. Erekshe atap ótetin jaıt, tótenshe jaǵdaı jáne shekteý sharalary kezinde 7 myńǵa jýyq volonter jumyldyryldy. Olar 313 myńǵa jýyq maska taratý aktsııalaryn ótkizip, 14 tonnadan astam gýmanıtarlyq júk túsirýge járdemdesti. «Biz birgemiz!» aktsııasy aıasynda kópbalaly jáne az qamtylǵan otbasylarǵa, jalǵyz basty qart adamdarǵa arnalǵan 31 myńnan astam azyq-túlik sebetterin jetkizdi, - dedi oblystyq ishki saıasat basqarmasynyń basshysy Azamat Muhamedchınov.
Ótken jyly oblys volonterleri respýblıkalyq jáne óńirlik deńgeıdegi aýqymdy jumystardy atqardy. Olar volonterlik bastamalardy qoldaý boıynsha shaǵyn granttar baıqaýy sheńberinde jalpy somasy 15,9 mln teńgege 53 grantty jeńip aldy. Volonter jylynyń qorytyndysy boıynsha oblystyń 56 volonteri memlekettik nagradalarmen, QR Prezıdenti Q.K. Toqaevtyń jáne Elbasy N.Á. Nazarbaevtyń Qurmet gramotalarymen jáne alǵys hattarymen marapattaldy.
– Elimizde koronavırýs indeti áli basylǵan joq. Sondyqtan byltyrǵy ádis-tásilderdi qoldana otyryp, volonterler jumysyn jalǵastyrý kerek. Kelesi másele, oqýshylardyń onlaın formatta oqýy. Bul bilim salasyndaǵy kúrdeli másele. Sondyqtan osynaý qıyn-qystaý kezeńde volonterlar oqýshylar men stýdentterge kómek qolyn sozýy qajet. Oblystyq bilim basqarmasymen birigip, bul máseleni sheshýdi tapsyramyn. Volonterlik qozǵalysty baǵyttarǵa bólmeı, naqty máselelerdi sheshýge jumyldyryńyzdar, - dedi Danıal Ahmetov.
Óńir basshysynyń aıtýynsha, bıylǵy jyly oblysta volonterler qozǵalysy densaýlyq saqtaý, bilim jáne áleýmettik qorǵaý basqarmalarymen etene jaqyn jumys isteýi kerek. Sondaı-aq, D. Ahmetov Táýelsizdiktiń 30 jyldyq mereıtoıyna daıyndyqty qazirden bastaýdy tapsyrdy.
Aıta keteıik, búgingi kúni oblysta barlyǵy 159 volonterlik uıym jáne toptar jumys isteıdi. Jalpy volonterler sany 31 817 adamdy quraıdy.