Volonterler 6,6 myń tonna gýmanıtarlyq kómek jınady
ASTANA. KAZINFORM – «Ulttyq volonterlik jeli» zańdy tulǵalar birlestiginiń ókili Gúljámılá Qamarova sý tasqynynan zardap shekken óńirlerge kómektesý jumystary jaıynda baıandady.
«Qazirgi kezde «Ulttyq volonterlik jeli» eriktiler jasaqtaryn jalpy úılestirý jumystaryn jalǵastyryp jatyr, sondaı-aq aımaqtyq front-ofıster jáne jergilikti seriktes uıymdar arqyly aqparat alynyp otyr. Biryńǵaı baılanys ortalyǵy da (+7 708 706 4242) zardap shekkenderge kómek kórsetýdi jáne jalpy úılestirýge arnalǵan. Ol boıynsha barlyǵynan, sonyń ishinde sý tasqynynan zardap shekkenderden ótinishterdi qabyldaımyz. Sonymen qatar, qazir tegin zańgerlik qyzmet kórsetýdi bastadyq», - dedi G. Qamarova Ortalyq kommýnıkatsııalar qyzmetindegi brıfıngide.
Bul turǵyda ol tıisti konsýltatsııany atalǵan baılanys ortalyǵynan alýǵa bolatynyn naqtylady.
«Jalpy respýblıka boıynsha jaǵdaıǵa toqtalsaq, qazir 43 myńnan astam volonter men jergilikti turǵyndar arasynan eriktiler jumyldyrylǵan. Respýblıkanyń 16 óńirinde jumys istep jatqan gýmanıtarlyq kómekti jınaý jáne jóneltý jónindegi shtabta sý tasqyny bastalǵannan beri 6 600 tonnadan astam gýmanıtarlyq kómek jınaldy. Sonyń 4 myń tonnasy zardap shekken aımaqtarǵa jiberildi. Eriktiler jergilikti atqarýshy organdarmen – ákimdiktermen, tótenshe jaǵdaılar departamentterimen tyǵyz baılanysta qyzmetin jalǵastyryp jatyr», - dedi Gúljámılá Qamarova.
Aıta keteıik, 20 sáýirde Ózbekstan Respýblıkasynan Qazaqstanǵa 15 júk kóligine tıelgen gýmanıtarlyq kómek keldi.
Buǵan deıin Qyrǵyzstannan jiberilgen gýmanıtarlyq kómek kólikteri sý tasqynynan zardap óńirlerge jetkizilgen.
