Volonter onkoradıolog Latıf Parpıev: Men – armany oryndalǵan adammyn
Volonterler - naǵyz kúreskerler. Muqtaj adamdardy kórse, olar eshqashan qalys qalmaıdy. Elde byltyr tótenshe jaǵdaı jarııalanǵan kezde volonterler turǵyndardyń áleýmettik qorǵalmaǵan toptary men áleýmettik mekemelerge tamaq pen jeke qorǵanys quraldaryn jetkizgen edi. Olar qıyn jaǵdaıǵa tap bolǵan adamdarǵa ataýly áleýmettik kómek kórsetti, qalalar arasynda materıaldyq-tehnıkalyq baılanys ornatty, ýaqytsha jáne juqpaly aýrýlar ortalyqtaryna túski as jetkizdi, kóp balaly jáne az qamtylǵan otbasylardyń balalaryna qashyqtan oqytýǵa arnalǵan jabdyqtar jınady, mektepterde qaýipsiz orta qurý úshin dıspenserler men antıseptıkter ornatty.
Álbette volonterlardyń bul isin bir ǵana maqalamen qamtý múmkin emes. Bizdiń bul maqalaǵa arqaý bolǵan keıipkerimiz – Latıf Parpıev. Ol – Nur-Sultan qalasynyń ońaltý dárigeri, onkoradıology.
Dárigerdiń kúni tańǵy jetiden bastalady. Latıf kúnde ádettegideı sýǵa túsip, tańǵy asyn ishkennen keıin birden jumysyna barady. Jumysynda Latıf Daýranuly tańǵy 9-dan keshki 6-ǵa deıin tirek qımyl júıesi buzylǵan balalarǵa kómek kórsetip keledi. Olarǵa massaj jasaıdy, ońaltý protsesin júrgizedi. «Reanımatsııa jáne ıntensıvti terapııa bólimi men jańa týǵan sábılerdiń patologııa bólimi jaǵdaıyndaǵy balalardy erte ońaltý» - bul dárigerdiń bastamasymen júzege asyrylǵan joba. Oǵan reanımatsııa men ıntensıvti terapııa kezindegi túrli aýrýlardyń asqynýyn aldyn-alý sharalary engizilgen.
Karantın bastalǵanǵa deıin Latıf Qazaqstannyń birneshe qalasynda bolyp, óziniń áriptesterine sheberlik saǵatyn ótkizetin. Ókinishke qaraı, elde Latıfteı mamandar az, sondyqtan mundaı is-sharalar erekshe mańyzǵa ıe ekenin atap ótý kerek.
Ońaltý dárigeri kúnine 10-ǵa jýyq naýqasty qabyldaıdy eken. Tańerteń balalarǵa bulshyq et jattyǵýy men gımnastıka jasasa, tústen keıin konsýltatsııa ótkizedi.
«Dáriger Latıf Daýranulyna habarlasqanyńyz úshin raqmet! Naýqastardyń ótinishiniń kóptigine baılanysty dáriger sizge jaqyn ýaqytta jaýap beredi» - dárigerge WhatsApp arqyly habarlasqanda osyndaı habarlama keledi. Dáriger de árdaıym jaýap berýge tyrysady. Jumys kestesiniń tyǵyzdyǵyna qaramastan, áleýmettik jelidegi de, messendjerdegi de saýaldarǵa ózi jaýap beredi.
Latıf bos ýaqytynda adamdarǵa kómek qolyn sozýǵa tyrysady. Ol «28 petel» klýbynyń volonteri. Bul klýb - adamdarǵa kıim toqyp, shala týǵan nárestelerdi emdeıtin reanımatsııaǵa aqysyz jetkizetin joba.
Statıstıkalyq málimetterge sáıkes, Qazaqstanda jyl saıyn myńdaǵan náreste shala dúnıege kelip, olardyń salmaǵy myń gramnan tómen bolatyn kórinedi. Latıftiń júnnen toqyǵan kıimderi balalardyń júıke talshyqtaryn oıatyp, olardyń ońalyp ketýine kómektesedi.
Latıfpen pikirles adamdardyń kóbi klýbta kıim toqýdy úırenipti. Klýbǵa aldymen jaı ǵana baqylaýshy bolyp kelgen dáriger kóp uzamaı balalardy qutqarýshylardyń qataryna qosylǵan. Kıimdi Latıf bos ýaqytynda, úıde, dámhanada, ushaqta toqı beredi eken. «Aqy tólemeıdi ǵoı. Osydan ózińe ne alasyń?» dep surasa, Latıf «qalaǵanymdy» dep jaýap beredi eken. Qazir ol - «28 petel» klýbynyń vıtse-prezıdenti.
Latıf suraqtarǵa ustamdylyqpen, biraq ázilmen jaýap beredi, arasynda qaljyńdap qoıady. Jyly kúni samokatpen júredi. Saıahattaǵandy jaqsy kóredi. «Zııan shektirme: ómir, ólim men neırohırýrgııa jaıly» - bul volonterdiń árqashan ózimen alyp júretin kitaby.
«Qatelik jasamaıtyn dáriger joq. Bárimiz de qatelesemiz. Meniń armanym oryndaldy. Men ómir súrýmen qatar, ómirdiń rahatyn sezinip kele jatqan adammyn» - deıdi Latıf kúlip.
