Voleıboldan el chempıonatynda 2 komanda kósh bastap keledi

ÓSKEMEN. KAZINFORM – Óskemen qalasynda voleıboldan áıelderdiń ulttyq lıga komandalary arasynda Qazaqstan chempıonaty ekinshi týrynyń oıyndary ótýde.

Osyǵan deıin kósh bastap kele jatqan «Berel» (Óskemen) men «Jetisý» (Taldyqorǵan) kezekti jeńisterine qol jetkizdi.

Óskemendikter «Qaraǵandyny» 3:0 (25:8, 25:21, 25:16) esebimen tize búktirse, taldyqorǵandyqtar «Arý-Astanadan» basym tústi – 3:0 (25:17, 25:21, 25:14). Olardyń ekeýinde de 22 upaıdan bar.

Sondaı-aq «Qýanysh» (SQO) «Almatyny» 3:0 (25:18, 25:20, 25:19) esebimen jeńip, 18 upaımen úshinshi orynǵa nyq jaıǵasty.

El chempıony «Turan» (Túrkistan) bes setke sozylǵan tartysty matchta «Aqtóbege» ese jiberdi – 2:3 (17:25, 25:16, 25:17, 18:25, 12:15).

Ulttyq lıgaǵa bıyl qosylǵan «Gratsııa KZ» (Oral) Pavlodardyń «Ertisin» qapy qaldyrdy – 3:0 (25:23, 25:21, 25:15). Bul – oraldyqtardyń ekinshi jeńisi.

Beısenbi kúni «Arý-Astana» - «Qýanysh», «Qaraǵandy» - «Turan», «Aqtóbe» - «Ertis», «Gratsııa KZ» - «Jetisý», «Almaty» - «Berel» komandalary ózara kezdesedi.

Eske sala keteıik, budan buryn Óskemende voleıboldan áıelder komandalary arasynda ekinshi týr oıyndary bastalatynyn jazǵan bolatynbyz.