Voleıbol: «Turan» alǵash ret Qazaqstan kýbogyn jeńip aldy

ÓSKEMEN. KAZINFORM — Óskemen qalasynda voleıboldan áıelder komandalary arasynda Qazaqstan kýbogynyń fınaldyq oıyny máresine jetti.

Bul joly el kýbogyn «Qýanysh» (SQO) pen «Turan» (Túrkistan) komandalary sarapqa saldy.
Asqar Shalqybekov jattyqtyratyn túrkistandyq qyzdar jartylaı fınalda favorıt sanalmasa da, Óskemenniń «Berelin» 3:1 esebimen jeńgen edi.

Fınalda da favorıt «Qýanysh» edi. Ótken jyly «Turan» óz tarıhynda tuńǵysh ret Qazaqstan chempıony atanǵan bolatyn. Onda komanda kapıtany Oral voleıbolynyń túlegi Sana Anarqulova edi. Bir maýsymdy Serbııada ótkizip, Qazaqstanǵa oralǵan Sana «Qýanyshtyń» namysyn qorǵaýdy qup kórdi. 

Matchty shynynda da ıÝrıı Panchenkonyń shákirtteri sátti bastady – 25:23. Degenmen ekinshi sette «Turan» basymdylyq tanytty – 25:19. Budan keıin «Qýanysh» qaıta alǵa shyqty – 25:21. Tórtinshi partııada soltústikqazaqstandyqtar qos birdeı matchbolyn paıdalana almady – 26:28.
Sheshýshi, besinshi sette «Turan» 8:4 esebimen alǵa ketti. Komanda kapıtany S.Anarqulovanyń sátti shabýyly arqasynda tarazy basy teńesti – 8:8. Biraq túrkistandyq klýbqa jýyrda qosylǵan kýbalyq Batısta ıÝneska Robles tegin kelmegenin kórsetti. Aqyry «Turan» jeńisti julyp aldy – 15:9. Qorytyndy esep – 3:2.

Osylaısha, «Turan» alǵash ret Qazaqstan kýbogynyń ıegeri atandy. Bul jeńiske komanda kapıtany, baılanystyrýshy Irına Kýznetsova, Zınat Gıesova, Aıgúl Múlkibaeva, lıbero Sandýǵash Asanova, reseılik Elena Samoılenko, serbııalyq Anjelka Novosel óz úlesterin qosty.

Eske sala keteıik, budan buryn voleıboldan Qazaqstan kýbogyn «Qýanysh» pen «Turan» komandalary sarapqa salatynyn jazǵan edik.