Voleıbol: «Qýanysh» klýby Óskemende «Berelden» basym tústi

ÓSKEMEN. KAZINFORM – Óskemen qalasynda voleıboldan áıelderdiń ulttyq lıga komandalary arasynda Qazaqstan chempıonaty úshinshi úlken týrynyń oıyndary ótip jatyr.

Seısenbi kúni ortalyq kezdesý alań ıeleri – «Berel» men «Qýanysh» (SQO) komandalary arasynda boldy.

Soltústikqazaqstandyqtar 3:0 (25:21, 25:21, 25:17) esebimen jeńiske jetip, ózderiniń sheberligi basym ekendigin taǵy bir dáleldedi. Dúısenbide almatylyqtardy dál sondaı eseppen tize búktirgen «Qýanysh» 51 upaımen ekinshi orynda keledi.

Al 55 upaımen kósh bastaǵan Taldyqorǵannyń «Jetisýyn» eshkim toqtata alar emes. Marko Grshıchtiń shákirtteri Óskemende aldymen «Astanany» 3:0 esebimen utsa, búgin «Qaraǵandynyń» meselin qaıyrdy – 3:0 (25:23, 25:22, 25:15).

«Berel» 40 upaımen úzdik úshtikti túıindep tursa, «Turan» (Túrkistan) tórtinshi orynǵa taban tiredi. Túrkistandyqtar «Qaraǵandydan» 3:1 esebimen aılasyn asyrsa, sodan keıin «Astanany» qapy qaldyrdy – 3:1 (18:25, 25:17, 25:13, 25:13).

Úshinshi týr oıyndary 20 aqpanda máresine jetedi.

Eske sala keteıik, budan buryn «Turannyń» Ortalyq Azııa chempıondar lıgasynda kúmis júldeger atanǵanyn jazǵan edik.