Voleıbol: «Aqtóbe» alǵash ret Qazaqstan kýbogyn jeńip aldy

AQTÓBE. KAZINFORM – Aqtóbe qalasynda voleıboldan erler komandalary arasynda Qazaqstan kýbogy oıyndary aıaqtaldy.

Fınalda alań ıeleri men Oraldyń «Jaıyǵy» altyn júldeni sarapqa saldy. 

Oraldyq klýb «Kondensat» bolyp atalǵan kezde Qazaqstan kýbogyn eki ret jeńip alsa, Ulttyq lıgaǵa ótken jyly qosylǵan aqtóbelikter mundaı tabysqa qol jetkizbegen edi. 

«Jaıyqtyń» bas bapkeri Vıktor Kozıktiń Qazaqstan ulttyq quramasyn qosa jattyqtyratyny belgili. Al «Aqtóbeniń» tizginin qolyna alǵan Sergeı Trıkozdyń bastaýymen Qazaqstan jastar quramasy bıylǵy Azııa chempıonatynda besinshi oryn alyp, alǵash ret 2025 jylǵy álem birinshiligine joldama aldy. 

S.Trıkoz sońǵy sheshýshi básekede Aıbat Netalın, Damır Ákimov, Roman Handrolın, Qadyrhan Nadyrhanov sııaqty tájirıbeli oıynshylarǵa senim artsa, «Jaıyq» sapynda búgingi oıynda Oral voleıbolynyń túlekteri Aıdyn Ádilbekov, Evgenıı Gof ta qosyldy.

Alǵashqy eki partııada aqtóbelikter 25:21, 25:22 esebimen basym tússe, úshinshisinde oraldyqtar esepti qysqartty – 25:23. Alaıda tórtinshi sette «Aqtóbe» jeńis núktesin qoıdy – 25:18. Jalpy esep – 3:1.

Osylaısha, «Aqtóbe» klýby óz tarıhynda alǵash ret el kýbogyna ıe boldy. 
Qola júldeni «Pavlodar» komandasyn 3:1 (25:17, 19:25, 25:21, 25:18) esebimen tize búktirgen «Jetisý» (Taldyqorǵan) jeńip aldy.

Ótken jylǵy kýbok pen sýperkýbok ıegeri – pavlodarlyqtar bıyl úzdik úshtikke de ilige almady. 

Eske sala keteıik, budan buryn «Aqtóbe» men «Jaıyq» komandalary Qazaqstan kýbogyna talasatynyn jazǵan bolatynbyz.