Vıtse-premer Altaı Aınabektiń jobasyna senbeıtinin aıtty

ASTANA. KAZINFORM — Premer-mınıstrdiń orynbasary — Ulttyq ekonomıka mınıstri Serik Jumanǵarın Senattyń jalpy otyrysynan keıin «jańbyr adam» atalyp ketken Altaı Aınabektiń atmosferany ıondaý arqyly jańbyr shaqyratyn apparaty týraly pikir bildirdi.

— Altaı Aınabek degen Qazaqstan azamaty Ózbekstanda qoldan jańbyr jaýǵyzatyn apparatyn sátti synaqtan ótkizip, jaýyn jaýǵyzǵanyn áleýmettik paraqshalarynda málimdep jatyr. Sol Ózbekstanǵa irgeles jatqan ońtústik óńirlerdiń keıbir jerinde qýańshylyq belgileri baıqalyp otyr. Qazaqstan bul jobaǵa nege qoldaý kórsetpedi, — dep surady jýrnalıst.

Serik Jumanǵarın ondaı jobany buryn estimegenin aıtty.

— Shynymdy aıtsam, ondaı jańalyqty birinshi ret estip turmyn. Eshteńe aıta almaımyn. Apparat bar, jańbyr shyǵarady — ol degen óte erekshe jaǵdaı. Meniń bir estigenim bar. Bir depýtattar jınalyp, Mańǵystaýda jańbyr shaqyratyn apparat satyp alǵan. Meniń bilýimshe, keıin organdar osy derek boıynsha qylmystyq is qozǵaǵan. Sol sebepti ondaıdy durystap tekserý kerek. Jalpy aıtqanda, senbeımin, — dedi Ulttyq ekonomıka mınıstri.

Sý resýrstary jáne ırrıgatsııa mınıstri Nurjan Nurjigitov te atalǵan jobany «ǵylymı dáleli joq» bastama dep ataǵan bolatyn.