Vıtse-mınıstr: 19 aýyl sýdy syrttan tasyp iship otyr

ASTANA. KAZINFORM — Ónerkásip jáne qurylys vıtse-mınıstri Qýandyq Qajkenov Úkimet otyrysynan keıin ótken baspasóz máslıhatynda Qazaqstanda ortalyqtandyrylǵan sýmen jabdyqtaý júıesinen bas tartyp jatqan aýyl bar ekenin aıtty.

— Jeke qudyǵynan sý iship otyrǵan 219 aýyl bar. Olar halyq az qonystanǵan eldi mekenderden sanatyna kiredi. Tipti ortalyqtandyrylǵan sýmen jabdyqtaý júıesinen bas tartqan aýyldar da bar. Mysaly, Qostanaı oblysyndaǵy Mıchýrın aýylynda joba daıyndalyp, qurylys-montaj jumystary bastalar kezde turǵyndar arnaıy shyǵyp, «óz qudyqtarymyz bar, ondaı júıe kerek joq» bas tartty, — dedi ol.

Mınıstrdiń orynbasary sýdy syrttan tasyp iship otyrǵan 19 aýyl bar ekenin aıtty.

— Olardyń halyq sany da belgili. Mysaly, Jetisý oblysyndaǵy Keregetas razezinde 5 adam, Qaıraqtas stansasynda 25 adam turady. Qostanaı oblysyndaǵy Semıletka aýylynda 52 adam ǵana turady. Ulytaý oblysyndaǵy № 66, 60, Q.Sátbaev. razezderinde 4-7 adamnan ǵana turady. Osyndaı eldi mekender sýdy tasyp iship otyr, — dedi vıtse-mınıstr.

Sondaı-aq, búgingi Úkimet otyrysynda Sý resýrstary jáne ırrıgatsııa mınıstri Nurjan Nurjigitov Syrdarııadan keletin sýdyń azaıyp jatqanyn «obektıvti shyndyq» dep sıpattady.