«Vıpa» taıfýnyna baılanysty Qytaıdyń ońtústiginde joǵary daıyndyq rejımi engizildi
ASTANA. KAZINFORM — Qytaıdyń ońtústigindegi Haınan jáne Gýandýn provıntsııalary «Vıpa» taıfýny Ońtústik Qytaı teńizine engennen keıin joǵary daıyndyq rejımine kóshirildi, dep habarlaıdy Sınhýa.
Qazir taıfýn saldarynan bul aımaqtarǵa qatty jel soǵyp, nóser jańbyr jaýyp jatyr.
Senbi kúni tańǵy saǵat 9:00–de Haınan provıntsııasynda sý tasqyny men taıfýnǵa baılanysty tórtinshi deńgeıdegi tótenshe áreket etý rejımi engizildi. Al Gýandýn provıntsııasynda tańǵy saǵat 11:00–de bul rejım tórtinshi deńgeıden ekinshi deńgeıge deıin kóterildi.
Haınan provıntsııasynyń meteorologııalyq qyzmetiniń málimetinshe, senbi kúni tańǵy saǵat 8:00–de «Vıpa» taıfýny tropıkalyq daýyldan kúshti tropıkalyq daýylǵa aınaldy. Onyń epıtsentri Haınan aralyndaǵy Venchan qalasynan shamamen 930 shaqyrym shyǵysta, Ońtústik Qytaı teńiziniń soltústik-shyǵys bóliginde ornalasqan.
Taıfýn soltústik-batys baǵytta saǵatyna 20 km jyldamdyqpen jyljyp keledi jáne barǵan saıyn kúsheıip jatyr. Ol Gýandýn provıntsııasyndaǵy Shenchjen qalasynan bastap Haınan aralyndaǵy Venchan qalasyna deıingi jaǵalaý aımaqtaryna jaqyndap keledi jáne jeksenbi kúni kúndiz ben tún arasynda qurlyqqa jetýi múmkin.
Senbiden bastap 22 shildege deıin Haınan provıntsııasynyń teńiz jaǵalaýlarynda jáne qurlyq bóliginde qatty jańbyr men ekpindi jel kútiledi. Sonymen qatar, Gýandýn men Haınan provıntsııalaryn bólip turǵan Tsıýnchjoý buǵazynda jeksenbi men 22 shilde aralyǵynda keme qatynasy ýaqytsha toqtatylýy múmkin.
Haınan astanasy Haıkoý qalasynda kóshelerdi sý basýy yqtımal. Al Gýandýn provıntsııasy naızaǵaı, daýyldy jel jáne tolqyn kóterilýine daıyndyq júrgizip jatyr.
Sondaı-aq Gýandýnda arnaıy qutqarý kemeleri, tikushaqtar, qýatty býksırler jáne tazalaý kemeleri daıyndyqta tur.
Eske sala keteıik, Qytaıda taıfýndarǵa qarsy tótenshe áreket etý júıesi tórt deńgeıden turady, onyń ishinde birinshi deńgeı — eń joǵary qaýip deńgeıi.
Budan buryn Qytaıdyń Ulttyq meteorologııalyq ortalyǵy (UMO) senbi kúni osy jyly alty ret tirkelgen «Vıpha» taıfýnyna baılanysty «sary» deńgeıdegi dabyldy uzartty.