«Vılka emes — shanyshqy!»: Qazaq tiline ǵashyq etetin kontent

ASTANA. KAZINFORM — «Búgin LIVE» baǵdarlamasynyń kezekti sanynda QazaqshaLike jobasynyń avtory Erdigúl Dádibasqyzy men onyń qyzy Kerbez Ýatjanqyzy qonaq boldy. Úsh jyl buryn ǵana jumysyn bastaǵan paraqshaǵa qazir 188 myń oqyrman jınalyp úlgergen. Áriptesterimizge suhbat bergen keıipkerimiz óziniń negizgi maqsatyn túsindirdi.

— QazaqshaLike ınstaparaqshasyn ózim júrgizemin. Negizgi maqsatymyz — orys tildi azamattar men ózge ult ókilderine qazaq tilin, qazaq mádenıetin, qazaq ónerin nasıhattaý. Osylaısha adamdardyń qazaq tiline degen mahabbatyn oıatý. Ózim qazaq tilin onlaın oqytamyn. Sheteldik kóptegen stýdentterim bar. Bul — Muqaǵalı: «Kúpi kıgen qazaqtyń qara óleńin shekpen jaýyp ózine qaıtaramyn», — degeni sekildi, qazaqtyń qarapaıym, kúndelikti ómirde qoldanatyn sózderin árlep, bezendirip, montajdap halyqqa jetkizý, — deıdi keıipkerimiz.

Ásirese sońǵy kezderi Erdigúl Dádibasqyzynyń qyzymen túsiretin kontenti halyq arasynda keń taralyp júr.

— Sońǵy ýaqytta Kerbez qyzymmen túsirgen beınerolık óte jyldam ári kóp qaralym jınap, áleýmettik jelide keń taralyp ketti. Buǵan deıin de biz túsirgen vıdeolar mıllıonnan astam qaralym jınap júrdi. Biraq ol kezde qyzym túspeıtin, — deıdi anasy.

QazaqshaLike jobasynyń avtory qyzymen kontent túsirý ıdeıasy qaıdan kelgenin de túsindirdi.

— Kóptegen jas otbasylar sekildi men de qatelik jibergenmin. Ol — balalarymyzdyń qolyna erte jastan smartfon ustatý. Al onyń ishinde tutynatyn aqparattardyń kóbi ózge tilde. Soǵan sáıkes balalarymnyń tili shubarlanyp bara jatqanyn baıqadym. Ásirese orys tiline basymdyq berilip kele jatty. Bıyl otbasymyzda ereje engizdik. Ol — otbasynyń ishinde, dastarqan basynda tek qana qazaqsha sóılesý. Bala degen jumsaq qoı, tez sińirip alady. Biz aıtqan árbir eskertýdi bul bala da sińirip alyp, birte-birte ózimizdi jóndeı bastady. Mysaly, «kýhnıaǵa kir» desem, «kýhnıa emes — as úı», «vılka bershi» desem, «vılka emes — shanyshqy» deýdi shyǵardy. Sodan keıin «nege osyndaı formatta beınerolık túsirip shyǵarmasqa?» degen ıdeıa keldi, — deıdi ol.

Odan bólek Erdigúl Dádibasqyzy balalardy qazaqsha sóıleýge úıretetin «Anashym, menimen qazaqsha sóılesshi» atty kitap shyǵarǵan.

— «Anashym, menimen qazaqsha sóılesshi» kitabynyń da negizgi maqsaty osydan týyndady. Jáne ol kitapshany men oqyrmandarǵa tegin tarattym. Kóp adamdar qyzyǵýshylyq tanytty. Telegram arnasynda tegin taratamyz. Onyń ishinde de osyndaı dıalogtar berilgen, — deıdi stýdııa qonaǵy.

Bir-birimen tek qana qazaq tilinde sóılesetin januıa balalarynyń ózge tilderdi de meńgerýine qarsy emestigin aıtady.

— Balalarymyz qos tildi bolyp ósip kele jatyr. Aýlada balalarmen oryssha sóılesedi. Men birneshe tildi meńgerýge múlde qarsy emespin. Mysaly, balalarymyz eki tilde de erkin sóıleı alady. Aǵylshyn tilin úırenip júr. Ulym nemis tilin úırenip júr. Kóp til bilý — kóp álemge esik ashady. Biraq otbasynda, dastarqan basynda, úıdiń ishinde mindetti túrde ana tilinde sóıleýi kerek. Otbasynda ata-anasy tek qazaqsha sóılese, balanyń tili qazaqshalanady, — deıdi Erdigúl Dádibasqyzy.

Eske sala keteıik, buǵan deıin BIZDIÑ ORTA podkasynda suhbat bergen Nazgúl Qojabek «Qazaq tili standartyn jasaý kerek» degen pikir bildirgen edi.