Vılnıýs qalasynda Abaıdyń oqý zaly ashyldy
Vılnıýs okrýginiń, Adam Mıtskevıch atyndaǵy, Qoǵamdyq kitaphanasynyń ǵımaratynda qazaqtyń uly aǵartýshysy Abaıdyń 175 jyldyǵyna oraı oqý zaly ashyldy.
Jańa qaýipsizdik erejelerine sáıkes, shekteýli quramda ótkizilgen is-sharaǵa, Seım depýtattary (parlament), memlekettik organdardyń, akademııalyq, qoǵamdyq jáne isker toptardyń ókilderi, sondaı-aq Lıtva buqaralyq aqparat quraldary qatysty.
QR Lıtva Respýblıkasyndaǵy Elshisi V.Temırbaev, óziniń quttyqtaý sózinde, Eýropanyń áıgili aqyny, Adam Mıtskevıchtiń qurmetine atalǵan kitaphanada, Abaı atyndaǵy oqý zalynyń ashylýynyń sımvolızmdy atap ótti. Abaı áıgili Vılnıýs turǵynyń shyǵarmalaryn ana tiline aýdarǵan alǵashqy shyǵys aqyny boldy.
Osy turǵyda, qazaqstandyq dıplomat, eýropalyq mádenıetke baýlý, reformator Abaıdyń umtylystarynyń biri bolǵanyn jáne ol, qazaq halqyn Shıller, Gete, Pýshkın jáne Baıronnyń eńbekterimen alǵashqylardyń biri bolyp tanystyrǵanyn jetkizdi.
Іs-shara aıasynda, Lıtvadaǵy eń úzdik opera ánshileriniń biri Raımonda ıAnýtenaıte jáne belgili kontsertmeıster Nııole Baranaýskaıte, Abaıdyń «Kózimniń qarasy», «Jelsiz túnde jaryq aı» jáne «Aıttym sálem, Qalamqas» sııaqty tanymal ánderin oryndady.
Rásimge qatysýshylar, bul zaldy tek Lıtvada ǵana emes, búkil Baltyq óńirindegi qazaq mádenıetiniń «tartylys ortalyǵy» dep atady. Óıtkeni, Abaıdyń oqý zalyn ashýǵa daıyndyq barysynda, Vılnıýs kitaphanasy men Qazaqstandaǵy eń kóne kitaphana - Abaı atyndaǵy Shyǵys Qazaqstan oblystyq ámbebap kitaphanasy arasyndaǵy yntymaqtastyq týraly kelisim jasaldy.
Sonymen qatar, oqý zalynda osy jyldyń sońyna deıin Elshilik, «Jara» (Žara) baspasymen birlesip, Lıtva tilinde jaryq kórgen, Muhtar Áýezovtiń «Abaı joly» roman-epopeıasyn jáne Ánýar Álimjanovtyń «Ustazdyń oralýy» romanynyń tusaýkeserin ótkizbek.
Aıta ketsek, Adam Mıtskevıch atyndaǵy, Vılnıýs okrýginiń qoǵamdyq kitaphanasy, Lıtva astanasynyń dál ortalyǵynda, burynǵy Zenkovıch-Tıshkevıch áýletiniń saraıynda ornalasqan, onyń tarıhy XV-XVI ǵasyrlardan bastaý alady.
