Vetnam úkimeti Telegram-dy buǵattaý týraly sheshim qabyldady
ASTANA. KAZINFORM — Vetnam úkimeti telekommýnıkatsııa operatorlarynan Telegram-dy el ishinde buǵattaýdy talap etti. Buǵan messendjerdiń qylmystyq ister aıasynda úkimetke paıdalanýshylardyń derekterin berýden bas tartýy sebep boldy, dep habarlaıdy Reuters.
Vetnam Tehnologııa mınıstrliginiń qaýlysyna sáıkes, telekommýnıkatsııa kompanııalary Telegram-dy buǵattaý boıynsha qabyldanǵan sharalar týraly 2 maýsymǵa deıin habarlaýy kerek.
Sondaı-aq qujatta Vetnam polıtsııasy usynǵan derekter usynylǵan, oǵan sáıkes eldegi 9600 Telegram arnasynyń 68 paıyzy zańsyz árekettermen, sonyń ishinde alaıaqtyqpen, esirtki saýdasymen jáne «terrorızmmen baılanysty» árekettermen aınalysqany anyqtalǵan.
Tehnologııa mınıstrliginiń ókili Reuters agenttigine qujattyń túpnusqalyǵyn rastady jáne buǵattaý týraly sheshim Telegram júrgizilip jatqan qylmystyq tergeý aıasynda úkimetke paıdalanýshylardyń derekterin berýden bas tartqandyqtan qabyldanǵanyn aıtty.
Messendjerdiń ózi ázirge jaǵdaıǵa qatysty pikir bildirgen joq.
Vetnam Kommýnıstik partııasy buqaralyq aqparat quraldaryndaǵy qatań tsenzýrany qoldaıdy jáne Meta, Google, TikTok sııaqty iri kompanııalarǵa qorlaý, jalǵan jáne úkimetke qarsy mazmundy qamtıtyn «zııandy» materıaldardy joıý boıynsha kúsh-jigerdi úılestirýdi talap etip, birneshe ret júgingeni atap ótildi.
Eske sala keteıik, Telegram alǵash ret 540 mıllıon dollar paıdaǵa keneldi.