«Veterınarııa» mamandyǵyndaǵy stýdentterdiń stıpendııasy ósýi múmkin
ASTANA. KAZINFORM — Elde veterınarlardy 11 joǵary oqý orny daıarlap jatyr. Bul týraly Aýyl sharýashylyǵy vıtse-mınıstri Amanǵalı Berdalın málim etti.
— Búginde «Veterınarııa» baǵyty boıynsha kadrlar daıarlaýdy 11 joǵary oqý orny júzege asyrady, onyń ishinde úsheýi Aýyl sharýashylyǵy mınıstrliginiń júıesinde. Olar 2025 jylǵa bólingen 1001 (77,5%) grant aldy. Bul rette, ótý baly jalpy konkýrs boıynsha — 62 baldy, aýyldyq kvota boıynsha 56 baldy qurady, — dedi A. Berdalın Senatta veterınarııalyq qyzmet taqyrybyn talqylaýǵa arnalǵan Úkimet saǵatynda.
Aýyl sharýashylyǵy men Ǵylym jáne joǵary bilim mınıstrlikteri mynadaı mindetterdi sheshý boıynsha jumys tobyn qurdy:
— «Veterınarııa» baǵyty boıynsha stýdentterge stıpendııany pedagogıkalyq baǵyttaǵy stýdentter deńgeıine deıin ulǵaıtý jáne veterınarııa mamandaryn daıarlaıtyn joǵary oqý oryndaryna túsý úshin Ulttyq biryńǵaı testileý baldarynyń shegin birtindep kóbeıtý;
— aýyldyq kvotany 30%-dan 70% (-) ǵa deıin arttyrý;
— aýyl sharýashylyǵy taýaryn óndirýshiler jiberetin nysanaly granttardyń úlesin ulǵaıtý;
— memlekettik tapsyrysty ornalastyrýdy tıisti materıaldyq bazasy, zamanaýı jabdyqtary jáne ǵylymı-pedagogıkalyq kadrlary bar joǵary oqý oryndarynda ǵana júzege asyrý;
— bir jyl oqý merzimimen 3 jyl ishinde memlekettik tapsyrys negizinde beıindi magıstratýra arqyly veterınarııalyq kadrlardy qaıta daıarlaýdy eskerý.
— Munyń bári qazirgi zamanaýı veterınarııalyq zerthanalyq jabdyqtarda jumys isteýge, veterınarııalyq qaýipsizdik protsesterin taldaýǵa jáne óz beıini boıynsha mamandanýǵa qabiletti bilikti kadrlardy daıarlaý qajettiliginen týyndady, sondaı-aq básekege qabiletti jastardy tartýǵa múmkindik beredi. Sonymen qatar, Memleket basshysynyń tapsyrmasyna sáıkes, Respýblıkalyq bıýdjet komıssııasy veterınarııa mamandarynyń jalaqysyn kóterý úshin 22 mlrd teńge kóleminde qarjylandyrýdy qoldady, — dedi vıtse-mınıstr.
Eske salsaq, kúzden bastap pedagogıkalyq mamandyqta oqıtyn stýdentterdiń stıpendııasy 84 myń teńge boldy.