Vengrııada zań boıynsha tek eki jynysty moıyndaý maquldandy

ASTANA. KAZINFORM — Vengrııa Parlamenti el Konstıtýtsııasy boıynsha «adam tek er nemese áıel bola alady» degen túzetýdi maquldady, dep habarlaıdy DW agenttigi. 

14 sáýir kúni Vengrııa Parlamenti Konstıtýtsııa boıynsha «adam ne er, ne áıel retinde ǵana bólinedi» degen ózgeristi qabyldady.

Keıbir sarapshylardyń pikirinshe, depýtattar qoldaǵan taǵy bir zańnamalyq ózgeris praıd-sherýlerin (LGBT sherýlerin) ótkizýge tyıym salýdy nyǵaıtýǵa baǵyttalǵan.

Jańa Konstıtýtsııalyq túzetýde bylaı delingen: «Vengrııa neke ınstıtýtyn er men áıeldiń ózara erikti kelisimine negizdelgen odaq retinde qorǵaıdy, sondaı-aq otbasyn ulttyń ómir súrýiniń negizi retinde tanıdy. Otbasy — neke men ata-ana men bala arasyndaǵy qatynastarǵa negizdeledi. Adam ne er, ne áıel bolady. Áke — er adam, ana — áıel», — dep jazdy «Azattyq radıosy» (Radio Svoboda).

Atalǵan túzetýlerdi 140 depýtat qoldap, 21 depýtat qarsy daýys bergen. Bul — el Konstıtýtsııasyn ózgertýge qajet úshten eki kópshilikti qamtamasyz etti. Ózgeristerdi Vengrııa Premer-mınıstri Vıktor Orban jáne onyń FIDES partııasy qoldap otyr.  

Zańnamaǵa engizilgen bul ózgeristerge qarsylyq retinde, Parlament ǵımaraty mańynda oppozıtsııa jaqtastary jappaı narazylyq sharasyn ótkizdi, dep habarlady dpa agenttigi.

Aktsııany shaǵyn oppozıtsııalyq Momentum partııasy uıymdastyrǵan. 

Buǵan deıin Vengrııa Halyqaralyq qylmystyq sottyń quramynan shyǵatynyn resmı túrde málimdegen bolatyn.

Aıta keteıik, Vengrııa prezıdenti Katalın Novak otstavkaǵa ketti.