Vengrııa Qazaqstanda bal óndiretin zaýyt salmaqshy
ASTANA. KAZINFORM — Ara sharýashylyǵy salasyndaǵy Eýropanyń jetekshi kompanııalarynyń biri — vengrııalyq Aranynektár Kft Qazaqstan aýmaǵynda bal óndirý jáne óńdeý zaýytyn salý jónindegi ınvestıtsııalyq jobany júzege asyrýǵa nıet bildirdi. Bul týraly AShM málim etti.
Joba barysy aýyl sharýashylyǵy vıtse-mınıstri Ermek Kenjehanuly men Aranynektár Kft kompanııasynyń bas dırektory Ferents Fýlmermen kezdesýinde talqylandy. Jobanyń maqsaty — zamanaýı, joǵary tehnologııaly, ekologııalyq taza ári Eýropalyq odaq standarttaryna saı eksportqa baǵyttalǵan ónim óndiretin kásiporyn qurý.
— Qazaqstanda ara sharýashylyǵy salasynyń turaqty ósýine qajetti barlyq jaǵdaı bar — qolaıly klımat, ekologııalyq taza orta, damyǵan ǵylymı baza jáne memlekettik qoldaýdyń tıimdi sharalary. Biz mundaı óndiristerge múddelimiz jáne jan-jaqty qoldaý kórsetýge daıynbyz. Bul jobany iske asyrý el ishinde qosylǵan qundy qalyptastyrýǵa ǵana emes, qazaqstandyq baldyń eksportyn edáýir arttyrýǵa múmkindik beredi. Sonymen qatar, EO naryǵynda laıyqty oryn alýǵa múmkindik beredi, — dep atap ótti Ermek Kenjehanuly.
2024 jyly Qazaqstanda bal óndirisi 5 myń tonnany qurady, bul aldyńǵy jylmen salystyrǵanda 1 myń tonnaǵa artyq. Jalpy kólemniń 58%-dan astamyn Shyǵys Qazaqstan, Pavlodar, Almaty, Túrkistan oblystary, sondaı-aq Abaı jáne Jetisý óńirleri qamtamasyz etedi. Memleket omartashylarǵa tikeleı qoldaý kórsetip otyr. 2025 jyldan bastap jańa sýbsıdııalaý tetigi engizildi — satylǵan árbir kılogramm bal úshin 200 teńge tólenedi. Bul omartalardyń rentabeldiligin arttyrýǵa jáne salany damytýǵa yqpal etedi.
Budan bólek, 2024–2026 jyldarǵa arnalǵan memlekettik ǵylymı zertteýler baǵdarlamasy aıasynda aralardyń genofondyn tıimdi paıdalaný júıesin ázirleý jáne ekologııalyq qaýipsiz óndiris tehnologııalaryn engizý baǵytynda qarjylandyrý qarastyrylǵan. Bul sharalar ónim sapasyn arttyrýǵa jáne halyqaralyq, sonyń ishinde EO naryǵy talaptaryna sáıkestigin qamtamasyz etýge baǵyttalǵan.
Óz kezeginde Aranynektár Kft kompanııasynyń bas dırektory Ferents Fýlmer Qazaqstandaǵy ara sharýashylyǵy salasynyń zor áleýetin atap ótip, uzaq merzimdi yntymaqtastyqqa daıyn ekenin bildirdi. Aranynektár Kft — Vengrııadaǵy iri bal óndirýshi jáne eksporttaýshy kompanııa. Kompanııanyń óndiristik qýattylyǵy jylyna 4 myń tonnaǵa deıin bal óndirýge jetedi, onyń shamamen 80%-y Eýropalyq odaq elderine, Taıaý Shyǵys pen Azııaǵa eksporttalady.