Vashıngtonda júrgizilgen operatsııa kezinde júzdegen adam ustaldy

ASTANA. KAZINFORM — AQSh astanasy Vashıngtonda 7 tamyzda bastalǵan qaýipsizdik sharalary aıasynda 465 adam tutqyndaldy, dep habarlaıdy Aq úıdiń baspasóz hatshysy Kerolaın Lıvıt.

Kerolaın Lıvıttiń aıtýynsha, prezıdent Donald Tramptyń qaýipsizdikti qamtamasyz etýge baǵyttalǵan áreketteri nátıjesin berip jatyr.

Onyń málimetinshe, tek ótken túnniń ózinde 52 adam ustalǵan, olardyń arasynda MS-13 qylmystyq tobynyń múshesi, zańsyz ımmıgrant bar.

Ol buryn mas kúıde kólik júrgizý men esirtki saqtaǵany úshin sottalǵan.

Sondaı-aq, baspasóz hatshysy Vashıngtonda túrli agenttikterdiń birlesken kúshimen úısiz adamdardyń 48 shatyrly lageri tazartylǵanyn habarlady.

Budan buryn habarlanǵandaı, AQSh prezıdenti Donald Tramp qaladaǵy qylmyspen kúresýge ýáde berip, úısiz-kúısiz adamdar Vashıngtonnan ketýi kerek ekenin jetkizdi.

AQSh-ta qańtar aıynan beri myńdaǵan adam «óz erkimen deportatsııalaný» baǵdarlamasy boıynsha elderine qaıtqany belgili boldy.