Vashıngton men Nıý-Iorkte Qazaqstan ádebıeti men mádenıeti ortalyǵy ashylady
Bul týraly Astana qalasyndaǵy Qazaqstan Respýblıkasy Ulttyq akademııalyq kitaphanasynyń baspasóz qyzmeti habarlaıdy. 
2016 jyldan bastap Ulttyq akademııalyq kitaphana shet elderdiń Ulttyq kitaphanalarynda Qazaqstan ádebıeti men mádenıeti ortalyǵyn ashý halyqaralyq jobasyn iske asyrýda. Qazirgi kezde álemniń 17 elinde ortalyq jumys isteıdi, onyń ishinde: Qytaı Halyq Respýblıkasynyń Ulttyq kitaphanalarynda, Koreıa Respýblıkasynda, Fınlıandııa, Túrkııa, Vengrııa, Japonııa jáne t.b. elder bar.
2018 jyldyń 19-23 qańtar aralyǵynda AQSh Kongress Kitaphanasy men Nıý-Iork qalasyndaǵy kópshilik kitaphanasyna Qazaqstan jaıynda kitap tapsyrý jáne Qazaqstan ádebıeti men mádenıet ortalyǵynyń saltanatty túrde ashylýy ótedi. Osy is-shara memleket basshysy Nursultan Ábishuly Nasharbaevtyń Amerıka Qurama Shtattaryna resmı sapary aıasynda júrgiziledi.
Іs-shara Qazaqstan Respýblıkasynyń AQSh-taǵy Tótenshe jáne Ókiletti Elshisi Erjan Hozeuly Qazyhanov, Qazaqstan Respýblıkasynyń Nıý-Iork qalasyndaǵy Bas konsýly Ábdrashov Jánibek Jarasqanuly, AQSh Kongress Kitaphanasy men Nıý-Iorktik kópshilik kitaphanasynyń Bas dırektory Entonı Marks, qoǵamdyq jáne shyǵarmashylyq zııaly qaýym, stýdentter men Qazaqstannyń Nıý-Iork qalasyndaǵy Ulttyq-mádenı ortalyǵyndaǵy qazaqstandyq dıaspora ókilderiniń qatysýymen ótedi.
AQSh-tyń Kongress kitaphanasy men Nıý-Iork qalasynyń kópshilik kitaphanasy álemniń úzdik ǵylymı kitaphanalary bolyp tabylady, baı tarıhymen jáne salt-dástúrimen, biregeı, rarıtettik basylymdarmen, qorlary arqyly búkil álem men keńistiktegi oqyrmandarǵa qyzmet kórsete alady.
Qazaqstan ádebıeti ortalyǵynyń ashylýy AQSh astanalyq ortalyq kitaphanasy oqyrmandaryna qazaq halqynyń salt-dástúri, mádenıeti, ónerimen jaqyn tanysýǵa múmkindik beredi. Bul Táýelsiz Qazaqstannyń jetistikteri men onyń ekonomıka, saıasat, áleýmettik salalardaǵy tabystaryn kópshilikke tanystyrýǵa jol ashady.
Ortalyqta Qazaqstan Respýblıkasynyń Prezıdenti Nursultan Nazarbaevtyń, sonyń ishinde, Elbasynyń álemdik saıası arenadaǵy orny men róline arnalǵan kitaptary, tarıh, ǵylymı-kópshilik jáne kórkem ádebıeti boıynsha kitaptar usynylady. Barlyǵy 200-ge jýyq kitap tapsyrylady. Bul kitaptar amerıkandyq oqyrmandary arasynda úlken qyzyǵýshylyqqa ıe bolyp, qazaqtyń baı mádenı murasyn tanýǵa múmkindik bereri sózsiz.
Qazaqstan ádebıeti men mádenıeti ortalyǵy Qazaqstan Respýblıkasynyń Mádenıet jáne sport mınıstrligi, Syrtqy ister mınıstrligi, Qazaqstan Respýblıkasynyń AQSh-taǵy Elshiliginiń yqpaldasýymen ashylady.
