Vandalızm — qoǵam derti: Elimizde jyl basynan beri qansha quqyqbuzýshylyq tirkeldi
ASTANA. KAZINFORM — Resmı derekterge súıensek, byltyr elimizde vandalızm boıynsha jeti qylmystyq is tirkelgen. Sonymen qatar usaq buzaqylyq boıynsha 26 myń, al bótenniń múlkin ádeıi búldirý boıynsha 4 myńnan asa derek bar.
Keshe ǵana Memleket basshysy Qasym-Jomart Toqaev mádenıet jáne óner qyzmetkerlerin quttyqtaý barysynda bul máseleniń ózektiligin taǵy bir márte eske salyp, ulttyq tárbıe men mádenıetti saqtaýdyń mańyzdylyǵyna toqtaldy.
Ásirese tarıhı-mádenı nysandar men tabıǵı qoryqtarǵa zııan keltirý boıynsha buzaqylyq ister tyıylmaı tur. Eskertkishterge atyn jazyp ketý, ǵımarattardy shımaılaý, aıaldamalar men lıftilerdi búldirý jıilegen.
Máselen jýyrda Mańǵystaý oblysynyń Túpqaraǵan aýdanyndaǵy tarıhı meshittiń syrtqy kelbeti zańsyz ózgertilip, belgisiz bireýler plastık tereze ornatyp, kirpish qalap tastaǵany qoǵamda úlken talqylaý týdyrdy.
Dál osy óńirdegi biregeı Ybyqtysaı shatqalyna zańsyz jazý jazǵan turǵyn da jaýapkershilikke tartyldy. Mańǵystaý oblysy Munaıly aýdany PB anyqtaý tobynyń anyqtaýshysy Ádilbek Qadirbaevtyń aıtýynsha, atalǵan derek boıynsha QR QK 294-babynyń 1-bóligine saı qylmystyq is qozǵalǵan.
— Qylmystyq is boıynsha Jaras Alıhan esimdi azamat ustalyp, kinásin tolyq moıyndady. Munaıly aýdandyq sotynyń úkimimen ol 25 táýlikke qamaqqa alyndy. Vandalızm, ıaǵnı taǵylyq boıynsha ózge de jazalaý sharalary bar, alaıda sot úkimi qamaqqa alýdy durys dep tapty, — dedi polıtsııa ókili Jibek Joly telearnasynyń Búgin.LIVE baǵdarlamasynda.
Qazirgi tańda zań boıynsha vandalızm úshin 100-den 200 AEK-ke deıin aıyppul, 100 saǵatqa deıingi qoǵamdyq jumystar nemese 50 táýlikke deıingi merzimge qamaý jazasy qarastyrylǵan. Tártip saqshylary halyqtyń kópshiligi tabıǵı oryndardyń mańyzyn jáne qylmystyq jaýapkershilikti túsinbeıtinin aıtady. Osyǵan baılanysty tergeý barysynda tabıǵı jáne tarıhı oryndarǵa arnaıy aqparattyq stendter men bannerler ilý týraly resmı usynystar berilgen.
Eske sala keteıik, buǵan deıin de Mańǵystaý oblysynda vandalızm boıynsha qylmystyq ist tirkelgen bolatyn. Vandal ejelgi petroglıfterdi búldirip ketken edi.
