BQO-da alaıaqtarǵa járdemdesken eki turǵynnan 1,5 mln astam teńge óndirildi

ORAL. KAZINFORM – Batys Qazaqstan oblysy Jańaqala aýdandyq sotynda talap qoıýshy K-nyń jaýapkerler G. men S-dan negizsiz baıý somasyn óndirip alý týraly azamattyq isi qaraldy. 

BQO sotynyń baspasóz qyzmetinen málim etkenindeı, talapker ınternet-alaıaqtarǵa tap bolǵan. Sodan keıin G-nyń banktik esepshotyna 719 myń, S-nyń esepshotyna 815 myń teńge aýdarǵan.

Jaýapkerlerdiń banktik esepshottary ózderiniń kelisimimen ashylǵan.

G. talap aryzben kelisken joq, al S. tolyǵymen moıyndady.

— Taraptar arasynda kelisim-sharttyq nemese basqalaı aqsha aýdarymyn jasaýǵa negizder bolmaǵan. Jaýapkerlerdiń sózine qaraǵanda, ekeýi bolmashy mólsherde aqsha tabý maqsatynda ınternet jelisi arqyly belgisiz adamdardyń usynýymen olarǵa banktik esepshottary týraly, jeke bas málimetterin, telefondaryna kelgen qupııa sózderdi bergen. Jańaqala aýdandyq sotynyń sheshimimen talapkerdiń talaby qanaǵattandyrylyp, G-dan 719 myń teńge, S-dan 815 myń teńge negizsiz baıý somalary jáne sot shyǵyndary óndirildi. Sheshim zańdy kúshine endi, — dep habarlady vedomstvodan.

Eske sala keteıik, budan buryn BQO-da alıment bereshegi 375 myń teńgeden asqan er adamnyń qamaýǵa alynǵanyn jazǵan edik.