Vaktsınatsııa jáne din: Islam men pravoslavıe dini vaktsınaǵa qalaı qaraıdy

QARAǴANDY. QazAqparat – Eshqandaı dástúrli dinde vaktsınaǵa tyıym joq, kerisinshe, ol densaýlyq saqtaýǵa degen umtylysty tanytady.

Qaraǵandy oblysynda óńirlik kommýnıkatsııalar qyzmeti platformasynda ótken onlaın-brıfıngte din ókilderi ıslam jáne pravoslavıe turǵysynan vaktsınatsııa máselesin talqylady, dep habarlaıdy QazAqparat tilshisi.

Qazaqstan musylmandary dinı basqarmasynyń Qaraǵandy oblysy boıynsha ókili Baýyrjan Meıirbekuly jáne Qaraǵandy jáne Shahtınsk eparhııasynyń Krestovozdvıjenskıı shirkeýi prıhodynyń ókili Aleksandr Ýgolkov atap ótkendeı, vaktsınatsııa – juqpaly aýrýlardyń aldyn alýdyń tıimdi ádisi jáne ıslamda da, pravoslavıede de ruqsat etilgen.

«Islamda vaktsınaǵa tyıym salynbaǵan. Din ár adamdy óz ómiri men densaýlyǵyna tıisti qamqorlyq jasaýǵa jáne aýrýdyń aldyn alý joldaryn izdeýge jol silteıdi. Bul rette vaktsınada sharıǵatpen tyıym salynǵan zattar bolmaýy tıis», – dep atap ótti Baýyrjan Meıirbekuly.

Shirkeý sonymen qatar ómirdi saqtaı alatyn vaktsınany qoldaıdy, dep atap ótti Aleksandr Ýgolkov.

Spıker Іnjil ýaǵyzymen Aleýt araldaryna jetken Irkýtsk Áýlıe Innokentııdiń ómirinen úzindi keltirdi.

«Araldardyń halqy qaýipti jáne ólimge ákeletin sheshek indetinen zardap shekti. Qudaıǵa senip, barlyǵyn duǵa etýge shaqyrǵan Áýlıe turǵyndardy jańadan paıda bolǵan vaktsınany saldyrýǵa shaqyrdy. Osylaısha, indettiń taraýy toqtady. Biz qazir koronavırýs ınfektsııasynyń ońaıshylyqpen ketpeıtinin kórip otyrmyz. Aınalamyzdaǵy adamdar áli de aýyryp, ómirden ozyp ta jatyr. Ǵalymdar atap ótkendeı, vaktsınatsııa – qaýipti aýrýdyń taralýyn toqtata alatyn birneshe quraldyń biri», – dedi Aleksandr Ýgolkov.

11 tamyzdaǵy jaǵdaı boıynsha Qaraǵandy oblysynda vaktsınanyń birinshi komponentin 427 196 adam, ekinshisin – 318 151 turǵyn aldy.