Vaktsına úsh kezeńdi synaqtan ótedi - akademık

ALMATY. QazAqparat - QR klınıkalyq jáne irgeli medıtsına akademıgi, Asfendııarov atyndaǵy QazUMÝ epıdemıologııa kafedrasynyń professory Sáken Ámireev onlaın brıfıng barysynda «QazVac» vaktsınasynyń qaýipsizdigin aıtty, dep habarlaıdy QazAqparat tilshisi.

«Vaktsına jasaý kezinde ol synaqtyń úsh kezeńinen ótedi. Birinshisinde, ony janýarlarǵa salady, ekinshisi eriktilerge salynady. Al, úshinshisinde kóptegen adamǵa salynady. Bul óte jaýapty is, sondyqtan oǵan óte muqııattylyqpen qaraıdy»,- deıdi spıker

Sáken Ámireev halyq arasynda koronavırýske qarsy vaktsınaǵa qatysty senimsizdik pen qaýeset baryn aıtty.

«Adamdar basy nemese taǵy bir jeri aýyrsa dárihanadan dári alyp, esh oılanbastan ishe beredi. Biraq vaktsınaǵa kelgende neshe túrli kúmándar týyndap jatyr. Bul jerde kúmándanýdyń qajeti joq. Halyqty koronavırýsten saqtap qalatyn bizdiń qolymyzda qazir vaktsınadan basqa eshteńe joq. Sondyqtan qoryqpaı vaktsınany saldyrǵan durys. Iá, halyq arasynda teris pikir taratyp júrgender de bar. 1980 jyldary qarasheshek aýrýy tarap, mıllıondaǵan adam qyryldy. Sol kezde osy vaktsıannyń arqasynda aman qaldyq. Qaı kezde de vaktsınaǵa qarsy shyǵatyndar bolady»,- dedi ol.

Professor vaktsına saldyrmas buryn oǵan qarsy kórsetkishteri bar, joǵyn tekserý kerektigin, ıaǵnı allergııalyq reaktsııany tekserý qajettigin aıtty.