Vaktsına alǵan stýdentter men oqytýshylar joldamalar men aqshalaı syılyqtarǵa ıe bolýda
Esterińizge sala keteıik, buǵan deıin QR Bilim jáne ǵylym mınıstri Ashat Aımaǵambetovtiń tapsyrmasy boıynsha ýnıversıtetter bilim alýshylar men qyzmetkerler arasynda vaktsınatsııany yntalandyrý sharalaryn ázirlegen bolatyn.
S. Amanjolov atyndaǵy Shyǵys Qazaqstan ýnıversıtetinde vaktsınatsııanyń tolyq tsıklynan alǵashqylardyń biri bolyp ótken stýdentter Sibe kólderiniń demalys ornyna joldama aldy. Ýnıversıtet rektory Muhtar Tólegen atap ótkendeı, stýdentter jappaı vaktsınatsııalaý naýqanyna belsendi qatysyp jatyr.
«Sibe kólderiniń demalys ornyna joldamany belsendi 20 stýdent jeńip aldy. Olar aktsııa jarııalanǵan sátten bastap vaktsınanyń eki komponentin saldyrǵan. Ýnıversıtette barlyq sanıtarlyq-epıdemıologııalyq talapty saqtaı otyryp, oqý jylyn bastaýǵa daıyndyq jumystary qyzý júrip jatyr. Maýsymnan bastap «Ashyq» júıesi jumys isteıdi. Barlyq aýdıtorııa, zerthana, sporttyq jáne basqa da oqý oryndarynda qajetti jumystar júrgizilip jatyr», – dep atap ótti Muhtar Tólegen.
«Vaktsınany alǵannan keıin biz óz densaýlyǵymyzdy qorǵap qana qoımaı, sonymen birge jańa oqý jyly qarsańynda demaldyq. Ýnıversıtet basshylyǵyna stýdentterge kórsetken qamqorlyǵy úshin alǵys bildiremiz. Bul vaktsınatsııany yntalandyrý boıynsha buryn-sońdy bolmaǵan qoldaý sharasy dep sanaımyn», – deıdi S. Amanjolov atyndaǵy Shyǵys Qazaqstan ýnıversıtetiniń stýdenti Vıktorııa Tkacheva.
Joǵary oqý ornynda stýdentter men oqytýshylardy yntalandyrý boıynsha birqatar basqa da sharalar qarastyrylǵan. 60-qa jýyq stýdent arnaıy jeńildikter men yntalandyrý syılyqtaryn aldy. Máselen, jataqhanada turýǵa jeńildikter, fıtnes-ortalyǵyna jáne basseınge abonementter. Qazirgi ýaqytta S. Amanjolov atyndaǵy Shyǵys Qazaqstan ýnıversıtetinde stýdentterdiń 86%-dan astamy, al qyzmetkerlerdiń 98%-y ekpe alǵan.
Sh. Ýálıhanov atyndaǵy Kókshetaý ýnıversıtetiniń stýdentteri men oqytýshylary arasynda da «Tulpar» saýyqtyrý keshenine joldamalar oınatyldy. Utys oıynynyń birinshi kezeńiniń qorytyndysy boıynsha 10 stýdent 25 myń teńgeden, al oqytýshylar men qyzmetkerler 50 myń teńgeden aldy. Ekinshi týr qyrkúıektiń birinshi onkúndigine josparlanyp otyr.
M. Áýezov atyndaǵy Ońtústik Qazaqstan ýnıversıtetiniń stýdentteri men oqytýshylary da qundy syılyqtar men joldamalarǵa ıe boldy. Jańa oqý jyly qarsańynda 10 stýdent bir kúndik avtotýrǵa jáne kıeli jerlerge saıahatqa barady, al 5 stýdent TOEFL emtıhanyn tegin tapsyrýǵa múmkindik alady. 1 shilde – 1 tamyz aralyǵynda vaktsına alǵan ýnıversıtettiń professorlyq-oqytýshylyq quramyna Saryaǵash shıpajaıyna joldamalar beriledi. Olar úshin sondaı-aq aqshalaı syılyqtar da qarastyrylǵan.
Qazaq ulttyq qyzdar pedagogıkalyq ýnıversıtetinde professor-oqytýshylar quramy men qyzmetkerlerdiń 90%-ǵa jýyǵy, sondaı-aq 18 jastan asqan myńnan astam stýdent ekpe saldyrdy. Vaktsına alǵan bilim alýshylardyń arasynda til kýrstaryna sertıfıkattar oınatyldy.
