Vaktsına alǵan ana: Ekpe jarnamalaıtyn dári emes, densaýlyq úshin qajet
«Men jas anamyn 2 aılyq balam bar. Negizi vaktsınany júkti kezimde alǵym kelgen, oǵan ruqsat bolmady. Sosyn bizge Pfizer ákeledi degennen keıin ekpe saldyram dep naqty sheshtim. Mine búgin alǵashqylardyń biri bolyp vaktsına alyp otyrmyn. Dál qazir ózimdi jaqsy sezinip turmyn, keri áseri baıqalmaıdy. Men vaktsına alýǵa júkti kezimnen daıyndalyp júrdim, tek ruqsattyń berilýin kútip júrdim. Sondyqtan eshqandaı eshqandaı senimsizdik, úreı joq. Onyń ústine otbasymda menen basqasynyń bári ekpe alǵan. Jáne men úshin qandaı vaktsına saldyrǵanym mańyzdy emes, mańyzdysy onyń tıimdiligi. Bizge Pfizer-di salýǵa ruqsat dedi. Tıisinshe men sol vaktsınany aldym», - dedi Gúlfaırýz Ysqaqova.
Sondaı-aq, jas ana qoǵamda vaktsına tóńiregindegi alyp-qashpa áńgimelerge qatysty pikir bildirdi.
«Óz basyma kelsem, meni eshkim májbúrlegen joq. Óz erkimmen aldym. Sebebi meniń otbasym, jaqyndarymnyń barlyǵy alǵan, sondyqtan men de ekpe saldyrýym kerek dep sheshtim. Vırýs tez taraıdy, meniń úlken ata-anam bar, meniń balalarym bar. Men solardy oılaımyn. Odan bólek, adamda qoǵam aldyndaǵy jaýapkershilik bolý kerek. Aınalamdaǵylardyń bári vaktsına alyp indetten saqtanyp jatqanda, men nege qalys qalýym kerek. Jáne men basqa analarǵa vaktsına alýǵa keńes beremin, biraq bireýdi májbúrlep kóndirýden aýlaqpyn. Árkimniń erki men sana-sezimi bar. Búginde barlyq memleket halqynyń tolyqtaı vaktsına alýy úshin bar kúshin salyp jatyr. Ekpe jarnamalaıtyndaı dári emes, bul aldymen densaýlyq úshin qajet. Onyń ústine tıimdiligi ǵylymda dáleldengen», - deıdi ol.
Aıta keteıik, búgin elordada Pfizer vaktsınasyn salý protsesi bastaldy. Ekpeni alǵash bolyp 17 jastaǵy astanalyq jasóspirim salǵyzdy.
Odan bólek, qalalyq qoǵamdyq densaýlyq saqtaý basqarmasynan vaktsına alǵysy keletin júkti áıelder men emizýli analardyń qatary kóp ekeni habarlandy.
