ІV Prezıdenttik jastar kadr rezervine irikteýdiń talaby túsindirildi
ASTANA. KAZINFORM – Bıyl elimizde 4-shi ret Prezıdenttik jastar kadr rezervine irikteý ótedi. Osyǵan oraı QR Memlekettik qyzmet isteri agenttiginiń Astana qalasy boıynsha departamenti túsindirý jıynyn ótkizdi.
Jıynǵa memlekettik organdardyń aýmaqtyq departamentterinen 100-den astam qyzmetker qatysyp, kadr rezervine irikteýge qatysty suraqtaryn qoıdy. Astana qalasy Memlekettik qyzmet isteri agenttigi departamentiniń basshysy Erbol Qabdyǵalıuly bastaǵan mamandar tyńdaýshylardyń suraqtaryna jaýap berip, jalpy jobaǵa qatysty málimetti baıandady.
Ár sala boıynsha kvota engiziledi
Departament basshysy Erbol Qabdyǵalıuly óz sózinde bıylǵy irikteýde ár sala boıynsha kvota belgilenetinin atap ótti.
— Bıylǵy basty erekshelik — ár baǵyt boıynsha kandıdattardyń birkelki sanyn qalyptastyrý maqsatynda ár kezeńde proportsıonaldy irikteý ótkiziledi. Atap aıtqanda, ár sala boıynsha tıisti kvotalar qarastyrylyp, irikteý sol salalyq baǵyt boıynsha ǵana júrgiziletin bolady, - dedi ol.
Qansha úmitker irikteledi?
Sondaı-aq departament basshysy bıylǵy mańyzdy irikteýden qansha jas maman óte alatyny atap ótti.
— Bul naýqannyń qorytyndysy boıynsha 50 rezervshini irikteý josparlanyp otyr. Bizdiń oıymyzsha bul jastar úshin tamasha múmkindik. Sondyqtan el múddesine qyzmet etemiz degen jastardy osy irikteýge belsendi túrde qatysýǵa shaqyramyz, - dedi Erbol Joldanǵar.
Spıkerdiń aıtýynsha, buǵan deıingi 3 irikteý qorytyndysy boıynsha Prezıdenttik jastar kadr rezervine 400 maman iriktelip alynǵan. Búgingi tańda olardyń 80 paıyzy tıisti laýazymdarǵa taǵaıyndalǵan.
Úmitkerlerge qandaı talap qoıylady?
Kandıdattarǵa qoıylatyn jalpy talap buǵan deıin ótkizilgen irikteýdiń talaptarymen birdeı:
- kandıdattardyń jasy 35-ten aspaýy;
- joǵary bilimi bolýy;
- bes jyldan kem emes eńbek ótili bolýy;
- qazaq tilin meńgerýi V1 deńgeıinen tómen bolmaýy kerek.
Іrikteýge qatysýǵa Prezıdent taǵaıyndaǵan adamdar, saıası qyzmetshiler, «A» korpýsynyń memlekettik ákimshilik qyzmetshileri, Prezıdenttik jastar kadr rezervinde turǵan adamdar jiberilmeıdi.
Іrikteý 6 kezeńnen turady
Erejege sáıkes, irikteý 6 kezeńnen turady jáne maýsym–qazan aılarynda ótkiziledi.
І kezeń. Rezervke alý úshin kandıdattardyń qujattaryn qabyldaý 1 maýsymnan bastap bir aı ýaqyt aralyǵynda arnaıy aqparattyq júıede onlaın rejımde júzege asyrylady.
ІІ kezeń — mátindik jáne sandyq aqparatpen jumys isteý qabiletin baǵalaý kezeńi (2–3, 9–10 tamyz). Ol eki bólek testileý blogynan turady.
Talapqa sáıkes keletin barlyq kandıdattardyń mátindik aqparatpen jumys isteý qabileti baǵalanady. Bul rette sandyq testileýge ár salalyq baǵyt boıynsha eń kóp ball jınaǵan kandıdattardyń 50%-y jiberiledi.
Testileýdiń qorytyndysy boıynsha kelesi kezeńge – sıtýatsııalyq tapsyrmalardy sheshýge úzdik nátıjege qol jetkizgen 600 kandıdat (onyń ishinde árbir salalyq baǵyt boıynsha 100-den aspaıtyn kandıdat) jiberiledi.
ІІІ kezeń — sıtýatsııalyq tapsyrmalardy sheshý kezeńi
(16–17 tamyz). Ol kandıdattardyń tańdaǵan salalyq baǵyttaryna baılanysty naqty problemalardy sheshý boıynsha usynystaryn baǵalaýǵa baǵyttalǵan. Bul kezeń onlaın-rejımde esse jazý formatynda ótedi.
Nátıjesinde, 22 tamyz ben 3 qazan aralyǵynda ótetin kandıdattardyń quzyretterin baǵalaý kezeńine 300 kandıdat ótedi.
ІV kezeń baǵalaýdyń eki blogynan turady: assessment-ortalyq jáne quzyretter boıynsha suhbat.
Assessment-ortalyq (22–28 tamyz) Memlekettik basqarý akademııasynyń bazasynda offlaın formatta ótedi. Ol kandıdattardyń boıyndaǵy minez-qulyq ındıkatorlarynyń jıyntyǵy arqyly qajetti quzyretterdi (kóshbasshylyq, taldaý jáne máselelerdi sheshý, qyzmetti basqarý, sendire bilý, proaktıvtilik) baǵalaýǵa baǵyttalǵan.
Assessment-ortalyqtan ótý qorytyndysy boıynsha
200 qatysýshy quzyretter boıynsha suhbattan ótýge jiberiletin bolady.
Quzyretter boıynsha suhbat blogy (23–28 qyrkúıek) kásibı
HR-menedjerlerdi tarta otyryp, ótkiziledi. Suhbat kandıdattardyń ishki ýájdemesin jáne qundylyq baǵdarlaryn aıqyndaıtyn quzyretterdi anyqtaýǵa baǵyttalady. Onyń qorytyndysy boıynsha kelesi kezeńge
150 qatysýshy jiberiledi.
V kezeń. Sarapshylyq komıssııasynda áńgimelesýdi
8–15 qazan aralyǵynda ótkizý josparlanyp otyr. Onyń qorytyndysy boıynsha Ulttyq komıssııa otyrysyna 100-den aspaıtyn kandıdat usynylady.
VІ kezeń. Rezervke úzdik 50 kandıdatty qabyldaý úshin Ulttyq komıssııanyń otyrysyn qazan aıynyń 25 kúnine deıin ótkizip, qazan aıynyń sońyna deıin sheshim shyǵarylady.
Aıta keteıik, buǵan deıin Prezıdenttik jastar kadr rezervine úmitkerlerdi bıyl qandaı synaq kútip turǵanyn jazǵanbyz.