V.Kozlovqa qatysty sot aktileri qaıta qaralmaıdy - QR Joǵarǵy soty

ASTANA. 5 tamyz. QazAqparat - Joǵarǵy sot aldyn ala qaraý qorytyndylary boıynsha, sottalǵan V.V.Kozlovqa qatysty sot aktilerin sot qadaǵalaýy tártibimen qaıta qaraýdan bas tartty. Bul týraly QR Joǵarǵy sotynyń baspasóz baıanynda habarlandy.

«Biz qadaǵalaý óndirisin qozǵaýdan bas tartý jóninde sheshim qabyldadyq, sot aktilerin qaıta qaraýǵa negizder joq», - dedi Joǵarǵy sottyń sýdıasy Morıak Shegenov.

2012 jylǵy 8 qazanda Mańǵystaý oblysynyń qylmystyq ister boıynsha aýdanaralyq mamandandyrylǵan soty V.Kozlovty múlkin tárkileýmen 7,5 jylǵa bas bostandyǵynan aıyrýǵa úkim shyǵardy. Vladımır Kozlovty sot QR Qylmystyq kodeksiniń úsh babymen - «Áleýmettik, ulttyq rýlyq, násildik nemese dinı arazdyq týǵyzý», «Konstıtýtsııalyq qurylysty kúshpen qulatýǵa nemese ózgertýge nemese Qazaqstan Respýblıkasy aýmaǵynyń tutastyǵyn kúshtep buzýǵa shaqyrý», «Qylmystyq qoǵamdastyqty (qylmystyq uıymdy) qurý jáne oǵan basshylyq jasaý, sondaı-aq oǵan qatysý» baptarymen aıypty dep tanydy.

19 qarashada «Alǵa!» tirkelmegen partııasynyń kóshbasshysy V.Kozlovtyń apellıatsııasyn Mańǵystaý oblystyq sotynyń qylmystyq ister jónindegi sot alqasy qanaǵattandyrýsyz qaldyrdy.