V Azııa oıyndarynyń ashylýyna jumyldyrylǵan 7,5 myń adamǵa 75 myń kostıým tigilgen
Saltanatty shara barysynda uıymdastyrýshylar túrikmen halqynyń ejelgi tarıhy men búginin ushtastyra otyryp, Túrikmenstannyń baı salt-dástúrin kórsetýge tyrysýda. Ashylý rásimine 7 myńnan astam óner qaıratkeri qatysýda. Olardyń 2 myńnan astamy kásibı bıshiler, mýzykanttar men ánshiler. Bir jyldan astam buryn ǵana ashylǵan 45 myń adam sııatyn Olımpıadalyq stadıonǵa 5475 erikti men 54 bala jumyldyrylǵan. Stadıonda ótip jatqan keıbir qoıylymǵa túrikmender asa qadirleıtin aqaltekeler de shyǵarylǵan.
Azııa oıyndarynyń ashylý rásimin uıymdastyrǵan «Balich Worldwide Shows» Marko Balıchtiń sózine qaraǵanda, búgingi saltanatty shara atalǵan kompanııa uıymdastyrǵan qoıylymdardyń ishindegi eń aýqymdysy bolmaq.
«Eki jarym saǵatqa jýyq ýaqyt ótetin sharaǵa shamamen 7500 oryndaýshy, 200 mýzykant, 10 janýar qatysady. Qoıylymdarǵa 75 myń kostıým tigilgen», - dedi ol.
Saltanatty rásimdi ózge birqatar memlekettiń basshylarymen birge Qazaqstan Prezıdenti Nursultan Nazarbaev tamashalaýda.
Aıta keterligi, búgin Nursultan Nazarbaevpen ekijaqty kezdesý ótkizgen Túrikmenstan Prezıdenti Ǵurbanǵuly Berdimuhamedovtiń aıtýynsha, Azııa oıyndaryna álemniń 64 memleketinen sportshylar kelgen. Buǵan qosa, BUU ótinishimen bosqyndar da bul jarysqa arnaıy komanda quryp, synǵa túspek.
Al Qazaqstannyń 150 sportshysy jarystyń 17 túrinen el namysyn qorǵaıtyn bolady. Olardyń qatarynda Olımpıada chempıony Olga Rypakova, grek-rım kúresinen álem chempıonatynyń 3 dúrkin júldegeri Nurmahan Tinálıev, qyzdar kúresinen álem chempıonatynyń kúmis júldegeri Juldyz Eshimova syndy sportshylar bar. Azııa oıyndarynyń ashylý saltanatynda elimizdiń kók baıraǵyn taekvondodan Qazaqstan chempıony Nurlan Myrzabaev ustap shyǵady.
