«Úzdik ádebıet» respýblıkalyq kitap jobasy bastaldy

NUR-SULTAN. QazAqparat – Ruh.kz portaly qyrkúıek aıynan bastap «Bookdating» respýblıkalyq kitap jobasyn bastady, dep habarlaıdy QazAqparat.

Jobanyń maqsaty – qazaq jastary arasynda kitap oqý mádenıetiniń artýyna úles qosý. Intellektýaldy orta qalyptastyrý. Kitapsúıer jastardan quralǵan alań jasaý.

Jobanyń mıssııasy: Qazaqstan Respýblıkasynyń Tuńǵysh Prezıdenti – Elbasy Nursultan Nazarbaev «Bolashaqqa baǵdar: Rýhanı jańǵyrý» atty maqalasynda bizge ınjenerler men dárigerler ǵana emes, qazirgi zamandy jáne bolashaqty tereń túsinetin bilikti gýmanıtarlyq sala mamandary da aýadaı qajet ekenin aıtty. Bul rette atalmysh joba álemniń úzdik ádebıetteriniń qazaq tilindegi aýdarma nusqalaryn keń kólemde nasıhattaýdy kózdeıdi.

Joba aıasynda, sondaı-aq «Rýhanı jańǵyrý» baǵdarlamasynyń «Jańa gýmanıtarlyq bilim. Qazaq tilindegi 100 jańa oqýlyq» jobasy aıasynda osy ýaqytqa deıin jaryq kórgen ádebıettiń taralymyn arttyryp, qoljetimdi etýdi kózdeıdi. Pandemııa jaǵdaıynda qoǵamdy bilim alýǵa, sol arqyly jańa múmkindikterge qol jetkizýge shaqyrady.

Joba Qoǵamnyń Medıabaılanys jáne PR basqarmasyna qarasty Ruh.kz portalynyń súıemeldeýimen, sondaı-aq óńirlerdegi jobalyq keńselerdiń atsalysýymen júzege asady.

Portal búginge deıin Stıven Kovıdiń «Jasampaz jandardyń 7 daǵdysy», Kotler men Garı Armstrongtyń «Marketıng negizderi» kitaptaryn talqylady. Bólimderdiń beınejazbasyn Ruh.kz portalynan kóre alasyzdar.

Jyl sońyna deıin portal Shyńǵys Muqannyń «Otbasy», Janarbek Áshimjannyń «Alǵashqy qońyraý», Deıl H. Shýnktyń «Oqytý teorııasy», Beınbrıj Jeıson, Gok Nıkola, Taınan Lızdiń «Medııa jáne jýrnalıstıka: teorııa men praktıkaǵa jańa kózqaras», Djeıms Robınsonnyń «Memleketter nege damymaı qalady?», Paýlo Koelonyń «Beıbit ómirdiń máni» kitaptaryn talqylamaqshy.