Úıimizge aman oralǵanymyzǵa shúkirshilik etip otyrmyz — BQO turǵyny
ORAL. KAZINFORM — Batys Qazaqstan oblysynda sý basqan úılerdiń jaı-kúıi tekserilip, shyǵyndar eseptelýde. Syrym aýdany Jympıty aýylynda úıine oralǵan turǵyndardyń biri — Klara Sarmuqanova Kazinform tilshisine óz baspanasy týraly áńgimelep berdi.
K.Sarmuqanovanyń aıtýynsha, S. Seıfýllın kóshesi 28-mekenjaıynda jubaıy Sadyq Rahymjanuly ekeýi turyp jatyr.
Onyń sózine qaraǵanda atalmysh úıge 1998 jyly kirgen. Qazirgi kezde uly Oral qalasynda turady, úıli-barandy, qyzdary turmysta.
«Komıssııa kelip, bárin anyqtaıdy. Jubaıym 74-te, bir aıaǵyn syltyp basady, aýyryp qala ma dep alańdaımyz. Ekeýmiz de zeınetkermiz, sýǵa ketken jerlerdi jóndep berse deımiz. Birjolǵy áleýmettik kómekti aldyq. Kóp adamnyń úıi qulap qaldy, oǵan qaraǵanda, shúkirmiz ǵoı, elmen birdeımiz», - dedi K.Sarmuqanova.
Syrym aýdany ákiminiń orynbasary, komıssııa tóraǵasy Qaırat Tólepovtiń málim etkenindeı, aýdanda sýǵa ketken 238 úıdiń 114-i turýǵa jaramsyz dep tanyldy. Bulardyń salatyn oryndary belgilendi. Keıbireýleri burynǵy oryndaryna, qalǵandary ınjenerlik jeliler tartylǵan jańa jerlerde turǵyzylady.
«Jóndeý qajet etetin úılerge baǵalaý júrgizilip jatyr. Shyǵyndar eseptelgennen keıin biz aqparatty oblystyq turǵyn úı-kommýnaldyq sharýashylyǵy jáne energetıka basqarmasyna beremiz. Basqarma arqyly qarajat kelgennen keıin ony turǵyndardyń esepshotyna aýdaramyz. Al esepte turǵan malǵa ótemaqy oblystyq aýyl sharýashylyǵy basqarmasy arqyly júrgiziledi. Bıylǵydaı tasqyn sý zardaptaryna jol bermeý maqsatynda aldaǵy ýaqytta Jympıtyda Óleńti ózeni jaǵalaýynda jáne Buldyrty, Jetikól, Qosoba aýyldarynda bógetterdi bıiktetý jumystary atqarylatyn bolady», - dedi Q.Tólepov.
Eske sala keteıik, budan buryn Batys Qazaqstanda sýǵa ketken 820 úıge turǵyndardyń qaıtyp oralǵanyn jazǵan bolatynbyz.
Jaıyq ózeniniń deńgeıi Oral qalasynda 8 metrge jýyqtady.
