Úıde órt shyǵýyna ne sebep bolady – qutqarýshylar taldaý júrgizdi
Jyl basynan beri Shyǵys Qazaqstan turǵyndarynyń úıinde 307 órt bolǵan. Onyń 97-si elektr aspaptary men jabdyqtaryn paıdalaný kezinde órt qaýipsizdigi talaptaryn saqtamaý sebebinen týyndaǵan. Osy rette TJD mamandary taldaý júrgizip, turǵyndardyń qandaı qatelikteri órtke ákep soqtyratynyn anyqtap kórdi:
- Páterde nemese úıde toqqa birden birneshe uzartqyshty, adapterdi qosý.
- Toqqa qosylǵan elektr aspabyn qaraýsyz qaldyrý (Máselen, uıaly telefondy zarıadtaý). Kóbine órt turǵyndar úıden shyǵyp ketken kezde bolady.
- Jarqyldaǵan rozetkalardy paıdalaný, sondaı-aq bir rozetkaǵa birden birneshe elektr qurylǵysyn qosý.
- Elektr aspaptarynyń janǵysh zattarmen jaqyn ornalasýy.
- Tozyǵy jetken jáne órt qaýpi bar elektr symdaryn paıdalaný.
«Qazirgi ýaqytta árbir elektr jelisine júkteme birneshe ese ósti. Biz teledıdardy ár bólmege qoıamyz, kondıtsıonerlerdi ilip, kir jýǵysh mashınalardy, elektr plıtalaryn qoldanamyz. Tipti elektr qýaty arqyly qosylatyn edendi jylytý júıelerin ornatamyz. Al jańa elektr qurylǵysyn satyp alǵan kezde «Al symdar buǵan shydaı ala ma?» dep oılanbaımyz», - deıdi ShQO TJD memlekettik órt baqylaý basqarmasynyń bastyǵy Nurjan Ómirjanov.
Onyń aıtýynsha, elektr qurylǵysyn esh ýaqytta qosyp ketýge bolmaıdy. Árkez esińizde bolsyn:
- Kez kelgen elektr qurylǵysyn qoldanar aldynda nusqaýlyqty muqııat oqyp shyǵyńyz.
- Qurylǵynyń jumys ýaqytyna jáne ony qosatyn toqqa qoıylatyn talaptarǵa nazar aýdaryńyz.
- Eger kompıýterdi, jylytqyshty, shańsorǵyshty bir rozetkaǵa birden qossańyz, onda júkteme aýyr bolýy múmkin ekenin qaperde ustańyz.
- Aqaýy bar rozetkalardy paıdalanbańyz.
- Úıden shyqqan kezde elektr qurylǵylaryn toqtan ajyratyńyz.