Uıaly baılanys operatorlaryna 100 mln teńgeden astam aıyppul salyndy

TÚRKІSTAN. QazAqparat – Ońtústik óńirlerdegi uıaly baılanys operatorlarynyń sapasyz qyzmeti úshin 100 mln teńgeden astam aıyppul salyndy. Bul týraly Shymkent qalasy jáne Jambyl, Túrkistan, Qyzylorda oblystary boıynsha óńiraralyq baılanys ınspektsııasy basshysynyń mindetin atqarýshy Bıdatqa Bımuratov málimdedi, dep habarlaıdy QazAqparat tilshisi.

Tsıfrlyq damý, ınnovatsııalar jáne aeroǵarysh ónerkásibi mınıstrligi Telekommýnıkatsııalar komıtetiniń Shymkent qalasy jáne Jambyl, Túrkistan, Qyzylorda oblystary boıynsha óńiraralyq baılanys ınspektsııasy 139 eldi mekenge jospardan tys tekserý júrgizgen. Atap aıtqanda, Túrkistan oblysynda 37, Shymkent qalasynda 66, Qyzylorda oblysynda 15, Jambyl oblysynda 21 eldi mekendegi baılanys júıesi tekserýden ótti.

«Memlekettik radıojúıeler qyzmeti mekemesiniń sertıfıkattalǵan ólsheý quraldaryn paıdalana otyryp uıaly baılanys sıgnaldaryna ólsheý júrgizdik. Mınıstrliktiń buıryǵyna sáıkes kórsetkishter berilgen. Uıaly baılanys sıgnaldary sol kórsetkishterge saı bolýy qajet», - dedi Bıdatqa Bımuratov.

Tekserýler nátıjesinde sapasyz baılanys úshin uıaly baılanys operatorlaryna 100 036 950 teńge aıyppul salyndy. Sondaı-aq, 81 nusqama berilip, 100-den astam hattama toltyrylǵan.