Úı kezeginde turǵan 200-den astam astanalyq baspanaly bolady – ákim
Bul týraly Nur-Sultan qalasynyń ákimi Altaı Kólginov málim etti, dep habarlaıdy QazAqparat tilshisi.
«Turǵyn úı jınaq banki» Elbasynyń tapsyrmasyna sáıkes qoljetimdi baspana baǵdarlamasynyń oryndalýyna aıtarlyqtaı úles qosyp otyr. Eger sandardy sóıletsek, 200 myńnan astam elordalyq osy jınaq bankten óz esepshotyn ashqan. Osy oraıda qýanyshty jańalyqpen bólise keteıin. Kelesi aptada Turǵyn úı jınaq bankiniń baspana kezeginde turǵan salymshylaryna 200-den astam páter kiltin tabys etemiz. Al kelesi jylǵa osy bank jáne «Báıterek» holdıngimen birigip turǵyn úıdiń sanyn arttyrýdy kózdep otyrmyz. Naqty jospar bar jáne oǵan qol qoıyldy», -dedi A. Kólginov.
Ákimniń aıtýynsha, bıyldyń ózinde 50 myńnan astam astanalyq turǵyn úı jınaq bankinen óz esepshotyn ashty.
«Osydan 16 jyl buryn Elbasynyń bastamasymen TMD aýmaǵynda alǵash ret Turǵyn úı qurylysy jınaq banki quryldy. Osy ýaqyt ishinde bizdiń salymshylardyń sany 1,5 mln-ǵa deıin ósti. Bıyldyń ózinde Nur-Sultan qalasynda 10 myń otbasy qonys toıyn toılady. Onyń ishinde 850 otbasy «Baqytty otbasy» baǵdarlamasy aıasynda baspanaly boldy. Búgingi jańa keńseniń ashylýyna oraı, baspanaly bolǵan otbasylardyń balalaryna jańa jyldyq syılyqtar tabys etilýde. Elbasynyń tapsyrmasyna sáıkes kelesi jyly turǵyn úı salasyna bólinetin qarjy 100 mlrd teńgege deıin ulǵaıady. Bul degenimiz elorda boıynsha 2 myńǵa jýyq, al Qazaqstan boıynsha 10 myń otbasy turǵyn úıli bolady degen sóz», - dedi «Turǵyn úı qurylys jınaq banki» AQ-nyń basqarma tóraǵasy Lázzat Ibragımova.
Aıta ketsek, búgin Nur-Sultanda Turǵyn úı jınaq bankiniń jańa keńsesi ashyldy. Onda 70-den astam maman turǵyn úıge qatysty qyzmettiń barlyq túrin kórsetedi.
