Úı almaq bolǵan óskemendik alaıaqqa 7 mln teńgesin berip qoıdy

ÓSKEMEN. QazAqparat – Óskemen qalasynda úı almaq bolǵan er adam alaıaqqa 7 mln teńgesin berip qoıǵan, dep habarlaıdy QazAqparat tilshisi.

ShQO polıtsııa departamenti baspasóz qyzmetiniń málimetine súıensek, polıtsııaǵa 34 jastaǵy qala turǵyny júgingen. Onyń aıtýynsha, beıtanys áıel páterdi tez ári arzan baǵada satyp alýǵa kómektesýge ýáde bergen. Óz qyzmeti úshin jábirlenýshiden 7 mln teńge alǵan.

Alaıda arada birshama ýaqyt ótkende áıel múlde habar-osharsyz ketken. Sol kezde er adam alaıaqqa aldanyp qalǵanyn túsingen.

Jedel izdestirý is-sharalaryn júrgizý kezinde polıtsııa qyzmetkerleri 57 jastaǵy kúdiktini anyqtady. Ol óz kinásin tolyqtaı moıyndaǵan.

«Búgingi kúni áıeldiń uqsas qylmystar jasaǵany úshin túzetý mekemesinde ekendigi anyqtaldy. Onyń taǵy eki alaıaqtyq faktisine qatysy bar bolyp shyqty. Ol týraly turǵyn úı satyp alamyn dep aqshasynan aıyrylǵan óskemendikter habarlady. Barlyq fakti boıynsha QR QK-niń 190-baby 3-bóligimen sotqa deıingi tergeý júrgizilýde», - delingen aqparatta.