Usynystarym halyqtyń qoldaýyna ıe boldy – depýtat
QYZYLORDA. KAZINFORM – Búgin Qyzylordadaǵy Ulttyq quryltaıǵa qatysqan Parlament Májilisiniń depýtaty Murat Ábenov halyqtyń áleýmettik hal-ahýalyn arttyrý baǵytyndaǵy usynystary qoǵamnyń zor qoldaýyna ıe bolǵanyn jetkizdi.
Ol ekonomıkalyq reforma sektsııasynda birqatar mańyzdy máseleni ortaǵa salǵan.
– Sonyń biri – bank salasynyń qyzmetin retteý. Merzimi ótken nesıeleri bar azamattardyń banktik shottaryn buǵattaý tájirıbesin qaıta qaraýdy usyndym. Óıtkeni bul adamnyń jumys isteýine, ártúrli tólem jasaýyna kedergi keltiredi. Bir sózben aıtqanda, adam quqyǵyn shekteýmen birdeı. Muny tolyǵymen toqtatý nemese jartylaı ǵana buǵattap, qarajattyń qalǵan bóligin adam ózi paıdalana alatyndaı múmkindik jasalýy kerek. Halyqtyń talap-tileginen týǵan usynysyma sáıkes bank qyzmetine qatysty sheshim qabyldandy. Qatań sharalar júzege asyrylatyn boldy. Onlaın nesıe berilmeıtin boldy. Nesıe alǵysy kelgen adam bankke ózi baryp, tirkelýi kerek, - dedi depýtat.
Jıi synǵa iligetin bilim jáne medıtsına salasy boıynsha da keıbir túıtkildiń túıini osy jıynda tarqatylǵandaı.
– Men buǵan deıin qur qańqasy ǵana bar, biraq qural-jabdyǵy joq jeke mektepterdegi bilim sapasy týraly aıtqan edim. Mundaı oqý oshaqtary adamdy jumysqa qabyldarda kóbine eńbek shartyn jasamaıdy. Ýaqytsha alady, onda da aılyq jalaqysyn durys tólemeıdi, zeınetaqy jarnasyn aýdarmaıdy. Prezıdent quryltaıda keıingi kezde ózine jekemenshik mektepterdi qarjylandyrý tetigine qatysty azamattardan kelip túsetin saýaldar jıilep ketkenin aıtty. Bilim berý salasynda memlekettik qarjylandyrýdyń qoldanystaǵy tártibi burmalanyp otyrǵanyn atap ótip, ony shuǵyl túrde túzetý qajettigin málimdedi. Osyǵan baılanysty Úkimetke bilim berý salasyn memlekettik qarjylandyrý mehanızmin jedel reformalaýdy mindettedi. Jıi synǵa iligetin medıtsınalyq saqtandyrý júıesiniń ashyqtyǵy týraly másele de kóterildi. Memleket basshysy Áleýmettik medıtsınalyq saqtandyrý (MÁMS) qoryndaǵy keshendi tekseris nátıjesinde kóptegen zańbuzýshylyq derekteri anyqtalǵanyn jetkizdi. Úkimettiń atalǵan saqtandyrý qoryn Qarjy mınıstrliginiń qaraýyna berý jónindegi sheshimin quptady, - dedi Murat Ábenov.
Buǵan deıin Parlament Májilisiniń depýtaty Nıkıta Shatalov quryltaıda Parlament pen jalpy saıası júıedegi halyq kútken mańyzdy ózgerister naqtylanǵanyn aıtqan bolatyn.