Úsh jylda agroónerkásip keshenindegi óńdelgen ónim úlesin 70 paıyzǵa jetkizý qajet - Prezıdent

Aýyl turǵyndaryna shaǵyn nesıe berý úshin 100 mıllıard teńge bólinedi. Bul týraly búgin elordada «Altyn sapa» jáne «Paryz» syılyqtarynyń jeńimpazdaryn marapattaý kezinde Memleket basshysy Qasym-Jomart Toqaev málim etti, dep habarlaıdy Kazinform.

«Taǵy bir mańyzdy mindet – azyq-túlik qaýipsizdigin qamtamasyz etý. Úsh jylda agroónerkásip keshenindegi óńdelgen ónim úlesin 70 paıyzǵa jetkizý qajet. Bul jumysty Úkimet bıznes ókilderimen birlesip atqarýǵa tıis», - dedi Qasym-Jomart Toqaev.
Prezıdent osy salanyń ımportqa táýeldiligin azaıtý úshin iri ınvestıtsııalyq jobalar qolǵa alynyp jatqanyn aıtty.

«Aldaǵy ýaqytta sút ónimderin shyǵaratyn 115 ferma salynady. Olar jyl saıyn 600 myń tonnaǵa deıin ónim beretin bolady. Sondaı-aq 15 iri qus fabrıkasy iske qosylady. Bul kásiporyndar jylyna 120 myń tonna et óndiredi. Munyń bári jalań tsıfr emes, bul – naqty mindetter. Árbir iri joba aýyl halqynyń turmys sapasyn jaqsartýǵa tikeleı áser etedi. Aımaqtardy damytýǵa mol múmkindik beredi. Men bul máselege árdaıym basa mán beretinimdi bilesizder», - dedi Memleket basshysy.

Prezıdent asa mańyzdy mindetterdiń biri aýyldy jan-jaqty damytýǵa qatysty ekenin atap ótti.

«Sebebi, aýyldy damytý – túptep kelgende, búkil Qazaqstandy damytý degen sóz. Sondyqtan bıyl biz «Aýyl amanaty» jobasyn bastadyq. Aýyl turǵyndaryna shaǵyn nesıe berý úshin 100 mıllıard teńge bólinedi. Sonyń arqasynda 18 myńnan astam jańa jumys orny ashylady. Kelesi jyldan bastap bıznesti damytýǵa arnalǵan biryńǵaı keshendi baǵdarlama qolǵa alynady. Bolashaǵy bar shaǵyn jáne orta bızneske basymdyq beriledi. ıAǵnı memleket óndiristik qabileti joǵary jáne eksportqa ónim shyǵaratyn kásipkerlerge qoldaý kórsetedi», - dedi Qasym-Jomart Toqaev.