Úsh tilde erkin sóıleıtin qalamnyń «qudireti»
«Qazaq tilin tez úıretetin amaldardyń biri - ınnovatsııalyq tehnologııalardy jasap, olardy qoldanysqa engizý. Sondaı-aq, qazaq tilinde aýyzsha sóıleskende jıi qoldanylatyn sózderdiń qory joq bizde. Eger de zertteý júrgizip, qandaı da bir tyńdaý qurylǵysynyń arqasynda adamdar qazaq tilinde bir kúnde, bir aptada, bir aıda, bir jylda qandaı sózderdi turmysta eń kóp qoldanǵanyn anyqtasaq, onda jıi aıtylatyn qazaq sózderiniń qoryn anyqtaı alar edik. Biraq, bundaı jumys aǵylshyn tilinde júrgizilgen eken. Biz sol zertteýdi negizge ala otyryp, jıi qoldanylatyn 50 myń sózdi aýdaryp, olardy oqyp, osy qalamǵa 50 myń sózdiń qazaq, orys jáne aǵylshyn tilderindegi nusqasyn osy qalamǵa syıdyrdyq», - deıdi osy tehnologııany oılap tapqan N.Qudaıbergenuly.
Qazaq tilin úıretetin joldardy izdep júrgen ǵalym bul jańalyǵyn búgin Nazarbaev ýnıversıtetinde ótken «Máńgilik eldiń máńgilik tili» atty halyqaralyq sımpozýmda alǵash ret tanystyrdy. Endi sý jańa ınnovatsııalyq tehnologııany Bilim jáne ǵylym mınıstrligine, mektepterge tanystyramyn deıdi. «Úsh tilde oqytýdy kózdegen Bilim mınıstrligi úshin bul taptyrmas qural bolar edi», - dep málimdedi N.Qudaıbergenuly.
