Úsh óńirde jańa teatr ǵımarattary salynady
ASTANA. KAZINFORM — Elimizdiń úsh óńirinde jańa teatr ǵımarattary salynady. Bul týraly Mádenıet jáne aqparat mınıstrliginen málim etti.
— Búginde elimizde teatrlardyń jańa ǵımarattaryn salý jumystary júrgizilýde. Aqtóbe qalasynyń Astana aýdany Altyn orda shaǵyn aýdanynda drama teatry qurylysy úshin eldi meken jer sanatynan jer telimi berildi. Jańa drama teatr ǵımaratyn salýǵa oblystyq bıýdjetten jobalyq-smetalyq qujattamany ázirleýge qarajat bólindi. Jobalyq-smetalyq qujat ázirlenip, memlekettik saraptamaǵa jiberildi. Saraptama ázirleýdiń merzimi 2025 jylǵy 10 shildege belgilendi, — dep atap ótedi mınıstrilikten agenttik saýalyna oraı.
Munan bólek, Qonaev qalasynda oblystyq drama teatr qurylysynyń jobalyq smetalyq qujattamasyn ázirlenip jatyr. Jer ýchaskesi resimdeý satysynda. Jalpy alańy — 13 332,03 sharshy metr. Jobanyń daıyndyǵy 30 paıyz. Saraptamanyń oń qorytyndysyn alýdyń josparlanǵan kúni — 2025 jylǵy jeltoqsan.
— Sondaı-aq, Shymkent qalasynyń ákimdigi Shymkent sıtı shaǵyn aýdanynda salynýy josparlanǵan opera jáne balet teatry ǵımaratynyń qurylysy boıynsha jobalyq-smetalyq qujattama ázirleý úshin Úkimet qaýlysyna sáıkes jobalaýshy mekeme retinde «Qazaq Project» JShS aıqyndalǵanyn málimdedi. Qazirgi kezde obektiniń eskızdik jobasy ázirlenýde jáne tıisti mekemelermen kelisilýde. Sonymen qatar jobalyq-smetalyq qujattama ázirleý úshin qajetti qarajatqa bıýdjettik ótinim jergilikti bıýdjetti naqtylaý kezinde beriletin bolady. Joǵaryda aıtylǵandardyń negizinde bıýdjet qurylysy boıynsha bıýdjettik ótinimder jobalyq-smetalyq qujattama daıyn bolǵannan keıin bıýdjettik zańnamaǵa sáıkes ázirlenedi, — dedi vedomstvodan.
Esterińizge sala ketsek, Memleket basshysy Qasym-Jomart Toqaev Býrabaıda ótken Ulttyq quryltaıdyń 4-otyrysynda Semeıde bir ǵımaratta úsh birdeı teatr syǵylysyp otyrǵanyn, aımaqtarda teatrlardy salýǵa jáne damytýǵa basa nazar aýdarý kerektigin aıtqan edi.
Osy oraıda Semeıde 15 mlrd teńgege Kongress holl salynatyndyǵy belgili boldy.